لومي على ناس

ننشد على ناس كانت معانا ،، وكنا حبايب وصحبه نقيه 

في بيت معلوم واضح مكانه ،،على البعد تشبح انواره قويه

ومربوعة العز فيها دفانا  ،،وكانون وناس والنار حيه

ونقاش عقال وافي اوزانه ،، ويحتد مرات يسخن شويه

وموحال في الرد تلقى عفانا ،، وما حد لي  خوه يضمر السيه 

متنوعه اقلامنا في لقانا  ،، وفيها من العلم وافر غنيه

واشعار مالقلب فيها رضانا ،، نمجد  ف هالوطن ناسه وفيه
اللي فضيقة الحال اهل الامانه ,, اللي اعروقهم طاقة في الميه
اللي جبال ماهزهم ريح جانا ,, ولا خربو الوطن بالمدفعية

ولصحابنا اندز كامل غلانا ،،وللوطن واﻷهل أجمل تحيه

واكثرهم اليوم هاجر اركانا  ،،ولاسباب مالفيس ماهي خفيه 

والفيس مانقول عنا خيانه ،، لكن مرض شين واحنا الضحيه 

بدى فيه فوﻻن يعرف فلانه ،، وميعاد مابينهم في العشيه 

بدى فيه هرطيل راكب احصانه ،، وفارس على سرز مافيش زيه

ماتعرفه منو عنده حصانا،، ﻻبد ورى لقب داره مطيه 

غدار وعمايله من ورانا ،، قليل خير باباه وأمه دعيه

حريصين عالفتن ماهم امعانا ،،مع ناس للفتن دارو خليه

وأعلامهم  سم مالي لسانه ،، يوزع فلدغات لنا هديه

وﻻهمهم وطن كثرة احزانا ،، وﻻجيل صارت أحواله رديه 

وﻻ وذن مسؤول تسمع ابكانا ،،وﻻ هامه اطياح سعد الرعية

لكن الكذاب عنده مكانه ،، ومقبول فجموعنا هالغبية  

وعفوا فهلفم خربت اوزانه ،، جمل ناسنا الباهية والرديه

من الهم والزيف كاثر خطانا ،، الزعلان نرضوه يأخذ خطيه 

في وين شيطان جامع اعوانا ،،وفي الفيس للناس كاتب وصيه 

ماتقبلو الصلح راهو اهانا ،، ولي مع الصلح ناقص حمية

وعاطي ضمانات وأول ضمانة ،، يموت قبل هالناس يفدي البقية

بالدم والروح يفدي اوطانا ،، صنديد من قبل صاحب قضية

ويجري ورى العافنه من ورانا ،،فتان لقاق خارب النية

تقول سحر معمول منا سقانا ،، انطيحو ورى العيب طيحة اميه

كانا شتم حد وﻻ نهانا ،، انطيعوه  نرموه بشتم زيه  

بلا بينه انتبعوا في هوانا ،، بلا علم ﻻ معرفة ﻻ ضوية 

وفوﻻدنا اليوم كاثر عزانا ،، اللي فارقو الهل من غير ديه 

ترى قول ياسامعي شن بلانا ،، من العار محصولنا والرزيه 

ﻻ ﻻمتا نجبدو في اغطانا ،، والنار دخانها   في الحوية 

تشن بينا انقتلو في ضنانا ،، اللي موتو موتة الجاهلية

نبو الخير والعز فرقة هنانا ،،بدى الوطن حماس واحنا القليه 

شح غيثنا وغار باعد ثرانا ،، وماتشوف في الوطن شجرات حيه

ويالله يارب تقبل دعانا ،، في الليل والفجر رافع ايديا 

يرجع اللي الظلم منا جافنا ،،اللي خاف ينشد باسم الهويه 

وتقودنا ناس في مستوانا،، عايشين في وطن ناسه نقيه

ويلتز نصاب مالبحر جانا ،، في حب هالوطن مانا سويه 

احنا حبنا يسيل داخل ادمانا ،،ونحموه باروح والبندقية

وحب غيرنا زور يبي رضانا ،، ويلعب فملعوب خطه ذكيه

لقى الوطن متروك دوبة اسنانا،، شرى ذمة اﻻخ  يقتل اوخيه 

وفيه بعض دلدول سابل اوذانا،،ﻻجى  من الميته ﻻ الحيه 

الحاصل على القول عاجز السانه ،، وخيك وفي الوجه جاتا ثانيه

وﻻ قافيه تفيد تنفع معانا ،، وﻻ حرف محبوك حبكه قويه

ناس غافله وفكر فاسد غزانا ،، اللي يرد مهناش حركه بطيه 

اراجو على منو زعمك عبانا ،، ومن وين هاﻻمل زعمك الجيه 

على طافيه انطيبو في غدانا ،، وياقعادنا بين طابت ونيه 

جاكم رمضان

الله وأكبر جاكم رمضان ،، يجرو بالخير سواقيه 

فلان اللي ودع شعبان ،، ويستنى تحل لياليه

وعارفهم فيهم غفران ،،فطين وماحد يوصيه 

على وجها باين فرحان ،، ويعرف هالشهر ومافيه 

مكتف محبوس الشيطان ،،حديث البخاري راويه 

ومقفوله أبواب النيران ،،مقسم والرحمه باديه 

وسطه للمؤمن غفران ،، تحزم لي ليله وحييه 

واخرهم فضل الحنان ،، المسلم مالنار ينجيه 

وماتنساش العشر أيام ،،توجه للخالق شاكيه 

وليلة تنجي اللي حيران ،،وفيها تنشال معاصيه

وفرصه للي كان وكان ،، يشمر مادام مواتيه

يسيب عادات الدوران ،،وللبيت يمد خطاويه 

يتوب ويرجع للايمان ،، عقاب الليل يمد يديه  

وفيه اللي طيب وانسان ،، حنيّن والغير يواسيه 

يقدر ويحب الجيران ،،ومايدير العيب وخاطيه 

كريم ومعروف بالحسان ،، اللي يشوفه تاعب يعطيه 

بشوش وماتشوفه زعلان ،، ويتبسم وين تلاقيه 

يرتل في أحزاب القران ،،وباحكام المصحف قاريه 

هضوم هما عباد الرحمن ،،الله يرحم والد ولديه

مشتاق نمش تدبديب

مشتاق نمشي تدبديب  ،،بين الحدب و الشعاب 

شوق الوطى للاشابيب  ،،تجي فايضه باﻷعشاب

اشاخيب تعقب اشاخيب ،،وفوق السحابه سحاب

يجي جور ماها تشقليب ،،يقل الحصى والتراب

في وين ماتعفس تغيب ،، رجلك اتجي للكعاب 

يموج السند والعراقيب ،،وتلبس خيار الثياب

منقوش فيها تخاضيب ،،تقول وهم وﻻ سراب

ويفوح من وردها الطيب،،مع الفجر عمم ضباب

وسبول داير شراريب ،، بدى فيه لون الطياب 

وحيون داير لواليب ،، مع الهود داير اسراب

وأقداح فيد الحلاليب ،، تجي فايضة للشراب 

تصب الشكاوي امازيب ،،في احفر وسط التراب

ومشتاق نشبح الذيب ،، وفي الجو طير العقاب

وخترش امداير دبيب ،، ولفاع تومي الرقاب 

وكانون داير لهاليب ،، عليه الحطب في الجناب 

وملهاد مليان  بسبيب ،، وميعاد أهل النقاب

وفرّوج ماهو على الكيب ،،على اسناح أم الصخاب 

ونخوض مخفي المساريب ،،في وين عش الغراب

ورقراق يبي تجاريب ،،وخفة اخطى والشباب

وبرور تبي أساليب ،، وكفوف ماهم ارطاب 
ولاطب لاهناك تطبيب ,, الا كوي ولا اعشاب
يبربر المجروح ويطيب ’’ وبالخيط قلع النياب

صبيعات كيف الكلاليب ،، يشدوه جمر الشهاب 

ويكالهم تمر وحليب ،، في ظل سمح الطناب 

ونخطو أصحاب التلوعيب ،،اللي الوطن منهم خراب

فالكذب حازوا ترأتيب ،، وداروا نظام الحزاب

مكاليب لمو مكاليب ،، يبو الذهب والقاب 

ﻻيعرفو حق ﻻ عيب ،،اﻻ نهش كيف الذياب

فقصور فيها مناسيب ،، عايشين لكن اذناب 

وراهم مشت في التلابيب ،،ناس خاطيين الصواب

رفعوه درجات ونقيب ،،وفي الفكر كيف الدواب 

من قبل ليهم مساريب  ،،وفي الجرم ليهم أصحاب

مجارم وكانو خنانيب  ،،محابيس خلف اﻻبواب 

التاريخ اهو قريب ،، شوفوه تلقوا الجواب

في الليل عقب المغاريب ،، يذاوحو  ز  الكلاب

واليوم عليو مراتيب ،، من الحرس دارو احجاب 

ومن قبل عشنا التحنديب ،،واليوم عشنا اﻻرهاب

سبحان ربي مكاتيب ،، يعلم أسباب العقاب

يالله ياعالم الغيب ،، خفف علينا الحساب

وجعل فرجها قريب ،، كربات رفعت احباب

وفرضاك وافر نصيب ،،وحسنات فوق الثواب

دعوة مظاليم ماتخيب .. على الله تلقى الجواب

زعمك يفيده كان قلت شهيد

قالوا عليه اقوال وزغاريد ،،وقالوا ولد يرحم اللي جاباته 

وقالوا شجاع وماﻻ صنديد ،،فزع لبلاده يوم ما ناداته 

خبر حق ثابت ثار بالتأكيد،،لكن عليم الله بي نياته

الناس تعرفه ماهوش جاي جديد،،مجرم خبيث ولص كانا واتا 

كان في الشوارع والطرق شريد،،ﻻحاس ﻻ بالوطن ﻻ ناساته 

واليوم يبي لبست العقيد ،، ويبي نياشينا وشكل عباته 

ويبي القيادة وأمر بالتنفيذ،، من برلمان ومؤتمر لخباطه 

ويبي صفوف محشده تحشيد،،ويبي عرب تهتف اليا شافاته 

عليك وقت متشقلب ودارك سيد،،ومدعوم ملي تشبهك حاﻻته

وبأين خراب الوطن كانا فيد ،،زﻻقيق كمشه يلعبوا بخيراته

علم دار فيه يقلدوا تقليد ،،ودايرين في هالشعب شي شماته

اليوم دايرينا ماعليه مزيد ،،يمشوا وراه يتبعوا في خطواته

اوين مات قالوا ياعليك فقيد،، صدمه كلاها الوطن يوم وفاته

استشهد وكتبوا في الحيوط شهيد،،مقبول عند الله في جناته 

زعمك يفيده كان قلت شهيد ،، ويمسح معاصي دارها في حياته

هيهات هلي دايره مايحيد ،،مكتوب بالاقلام في كتاباته

وﻻ في الحساب بينفعه تمجيد،،وﻻ صورته عالحيط سر نجاته

،،وﻻ دبدحة في اعلام ﻻ نشيد،وﻻ شهرته بتزيد في حسناته 

كأنه حياته عاشها عربيد ،،والخمر والتحشيش من صفاته

بالعنف والتقتيل والتهديد ،،سبب مشاكل واﻻطماع عماته 

ﻻفرض ﻻسنه وﻻ في العيد ،، يرجع يفكر في نهار صلاته

عاش الحياة في اللهو والتغريد ،،وبالظلم عبى لسفر مخلاته

وفارق الدنيا والعقاب شديد،،لكن الخالق واسعه رحماته 

حاظر ارد عليه

حاظر ارد عليه ،، ونقوله كلمات فيها الخير 

بالك غشيم وجاهله ماضيه،،وﻻ حديث السن جاي صغير

ونفهمه هالقول شن تاليه ،، اﻻ الفتن بين الناس والتدمير

وكأنه أستاذ الحقد حضر فيه،،شاطر المحصل فيه ماجستير

والكره في قلبه بدى عاميه ،، والناس تعرف معدنه شرير

والخير قاطع شجرته ناسيه ،، سنين طايله مرت عليه خبير

بسنة رسول الله بنحاكيه ،،وقبله كتاب الله والتفسير

ونخاطبه بالطيب والناجيه ،، ورب العباد يحث عالتذكير 

وبالنصح والتحذير والتوجيه ،، بالكش يصحى في اﻻعماق ضمير

وكأنه على رصفه حرث يبيه،، صابه وياكل من وراه شعير

مهبول يمكن ربنا يشفيه  ،، عليه القلم مرفوع خلي يدير

وكأنه يتبع والطمع عاميه  ،،وبالحقد يمشي وفي الخلاق فقير

ندعو الكريم برحمته يهديه ،، ونقوله راهو الزمان قصير

أكل خوت وأنت مبلي وسفيه،،تقول في كلام يودرك تودير

عليك الدعى من الزوز وتلاقيه ،،تجيك مأكنه وتكسرك تكسير

اللي بينهم بالفتن تبتنهيه ،،تحساب تلقى من وراك يسير

اترك عليك الحقد كون نبيه ،،ولي كسرته صعب في التجبير 

بالكش تلقى حل والداويه ،، الدير فعل طيب يقبلوه الغير 

وتزور هلى خوك ومجافيه  ،،وينطق باب الريح بمسامير 

ونلهو بأمن الوطن وجلاويه ،، والركبو عدسات للتصوير

ونرعو حدوده من اغراب تجيه ،،نديرو رقابة ونزبطو التزوير

ولي ملقي للكريم ايديه ،، ويبي صلاح الوطن والتعمير

ان شاء الله البركة في الكلام وفيه ،،وجمله عليه  نأمنو بالخير

عايش وشابح من زمان

هذه واحده من قصائد  شاعرنا سي عبد الحفيظ بن حديده عليه رحمة الله

يسطر فيها تجريته في الحياة ويعدد انواع من البشر  وصيفاتهم  والطيب منهم والخبيث

بما يحاكي واقعنا المرير  وما نراه اليوم  من تصرفات البعض  ويقول فيها : -

عايش وشابح من قديم زمان ** وعندي على حال الحياة تجريب

تفاصيل عارفها خفى وبيان ** على كل صيفه خير وتحنديب

خبر قايله ماهو طفير اللسان ** وجايب عليه القول بالترتيب

عاشرتهم ياسر الوان الوان ** وياسامعي خوذ الخبر تصويب

وحق من رسل الرسل والقرآن ** وعالم على حال العباد رقيب

في بعض صيفاته كما الشيطان ** يخلي رضيع الثدي راسه شيب

ريت العرب والترك والطليان ** ما ريت كيفه في العباد غريب

لادين عنده لا وفاء ويمان ** عاصيه ربي كذب وتقوليب

يسمسر بخوه وبوه في الميدان ** اليا كان يعرف مكسبه في الجيب

شاشيد ما بين الرفق فتان ** واقد لهيب الفتن بمشاهيب

اليا ماعرفته تقول غير انسان ** يقدم الطاعة واللسان رطيب

تحساب صاحب معرفه واحسان ** وهو مقاصد نيته تخريب

حاشاك يتركب كما السرطان ** ما عاد تلقاله دواء وطبيب

وسمّه على وجها ردان ردان ** تقول غير حربه مخضبه تخضيب

يقول في خبر مقلوب قال افلان ** وبعدين يظهر فتن واكاذيب

يخلي القلوب الصافيه عدوان ** اللي قبل في السابق تقول حليب

ونار حقد في قلبه بلا دخان ** لو كان يلقى يذوبك تذويب

ويضل يتموسح كما الثعبان ** كانك غفلت ينيبك تنييب

بخنجر خيانه يطعنك طعنان ** قلت حياء لاسحو لا ترييب

غدار متربي على الخونان ** اواخذ حسابه من النصيب  نصيب

وكانك عطيته في خاطرك الامان **  كيف من يرعي في المعيز الذيب

يصكك اليا واتاه في الصكان ** امدرب عليها حاجته تدريب

يجري ورى سوق البلى جريان ** وكان حصله يجدب امعاه جديب

واخذ طريق الشكر والذمان ** يحفر حفير السو وزراديب

وقت المصالح يعبدك عبدان ** تحساب ماعادش وراه حبيب

عليك تنفتح من جنته بيبان ** وبزور يحكيلك اميات سريب

يكافيه دير الخير بالنكران ** لين عالمليح يتوبك تتويب

وكانه عرف كذبه عليه يبان ** تشبح عيونه مروبه ترويب

يبرم اصداغه ويرتخو لوذان ** ما يستحي من شتم لا تهذيب

وهالشكل منا خاطري مليان ** وكبدي على سمر يدير لهيب

ولزفات ماليهم حرم لاشان ** ردي وصفهم في الاصل والتنسيب

اليا كان جيت فوسطهم تنهان ** ولا عندهم واحد اتقول اديب

يذوق الحديث ويفهم القولان ** وينهي على دير الخطا والعيب

هاضوك بيهم خاطرك يطمان ** ولاد لصل لايمكن نهار تخيب

ولا يوم قاصدهم مشى زعلان ** يلاقي قداهم قدر وتشرهيب

اولاد بن حسن

اولاد بن حسن اليوم يافرحتهم .. روح الحاج وباينه لمتهم

افراح كبيرة .. عاجز عليها خوك في تعبيره
يفكر بنادم قبل كيف مصيره .. اللي خاطفينه منين شن حجتهم
وتبدى تخمم والظنون كثيره .. مجارم علينا يفرضو كلمتهم
ودايرين منكر شين واعر ديره.. وفي كل جيه يعاودو فسيرتهم
لا مخليين شيوخ ناس كبيره..ولا مخليين اصغار في روضتهم
في الكوفنو ينباع بالتسعيرة .. بنادم بدى معروض في سلعتهم
ولي سمعني واجبي تحذيره .. وليام عكست شعبنا واتتهم
لكن ايام الظلم دوم قصيرة .. واليسر بعد العسر من صيفتهم
كلام ربنا وموضحاته السيره .. واهو الدليل اليوم في زحمتهم
ناس طيبه جتهم اليوم غفيره .. تبارك ارجوعه بالفرج هنتهم
الله لا تعاود ماجرى لغيره .. وقطع علينا ياقوي جرتهم