جيت طالب حسبه تعرفها

جيت طالب حسبه تعرفها …..حسبه اطول والتلفها

جيت انطالب فيك بدين……….قديم وما بيت اتوفيه

تلوص من مده وسنين……ومش باين فيك بتعطيه

وتوعد من مــدة عامين…….استناني توه انوتيـــه

يا فالجمعة يالثنين .......…انجيكم والجيب معبيه

وتاخذ من ورقة عشرين …..اللي يوفي ويزيد عليه

ونبدو انعدوا فرحانين…….السبت اللي جاي اراجيه

مشو عدو قيس الشهرين….تلوص والوجه مغطيه

وتطلع كذاب بوجهين………تبرر في الموعد ناسيه

ركيك وصاحب دم رزين…..وما تسمع  فلي تحكيه

وهاني جيتك بشيابين……وناوي لحساب انصفيه

شرق خشت فيه سكاكين….يرحب بفمه ويديه 

وجابلهم خمس بطاطين……ويبي الصقعان يدفيه

ودورت عيوني لثنين……..منظم كل شي موازيه

ولاونه فيه صوالين………..منسق والورد امحاذيه

ولاونه فيه تلاوين………….ستاره من روما شاريه

وسجاده فاخر ومتين…….على رخامه زين مغطيه

ومكتب مليان دواوين…………مستف ياريته قاريه

وفي الحيط امعلق يس…….مظاهر والباقي خاطيه

الحاصل تاهت فيه العين…….الراجل متنغنغ تاريه

وفي الماضي قلت امسيكين…وزلبحني رث كساويه

وركبت في الروح براكين….انبكبك في سري كاميه

وفجأه قلنا الراجل وين……..بعد رحب خير بلاويه

وفي الداخل حس نساوين…..وسبان وصوت امعليه

حلف الشيباني بيمين ………ويطمطم شين رغاويه

انه جاي لتخليص الدين…..وكان رفض ياحيه عليه

وسمعت لحنينه ليمين…….وجت تصهل توه انوريه

الشيباني اللي يحلف وين……وشن دخله يلعن ولديه

الراجل ما عنداش منين …..امفلس والوقت امواطيه

وشافتلي بحقد دفين…………وقالت دينك ما تراجيه

وعندك واحد من لثنين……..اتشيله ولا الولف يجيه

تمخلج ناض على الركبين……الشيباني مد خطاويه

وراه الشبشب دار زنين ……..وحتى عكوزه ناسيه

وروح خوك ايكت اينين……..توجه للمولى يشاكيه

وياطيب دير موازين……..ورزق الدنيا راهو اخيــــه

وعامل هلي دار الشين......وخلي مولانا يجازيه

سلف واعطي وكون حنين…..وصفي المتخبل قانيه

وبنادم مايكون ضنين…….ويعطي حتى في كلاويه

وما بين الشده واللين…….يبان من الصاحب باهيه