الوطن اللي دمه مسفوح

الوطن اللي دمه مسفوح .. خطاوي ناسه فيه اقصار

 خطاويهم بطلوع الروح .. الي ينجى صابوه اضرار

 حال اللي مليان جروح .. وقف لكن صابه دوار

 حال اللي خدّام اسطوح ..  تكردس جى فوق الكسار

 قعد في دماياته مطروح ..  نزف منها وحكمة لقدار 

حال اللي صوته مبحوح ..  ينشد في لطرش شن صار

 الوطن اللي يشكي وينوح  .. مسيطر عالوضعه لشرار

 يخش البراني مسموح ..  ويتحكم في اصحاب الدار 

اللي من وطنه جاي يذوح ..  بدى ف بلادي من التجار

 اللي وطني منهم مذبوح ..  اللي خلو العيشه مرار

 شوف الشاب اللي مجروح .. وغيره مامناش اخبار 

وحوش الجيران المفتوح .. خذوه اللي قالو ثوار

 وقبله حوش فلان لقوه ..  مدخن ولعت فيه النار

 ونازح ساكن تحت اللوح .. يعاني في الحر ولمطار

 وجاره في فراشه مطروح .. يراجي يصدرلاش قرار

 يعالج في مرسى مطروح .. ويرجع في صحه سطار

 الليبي ماعاد ليه طموح ..  الا النعمه وسعر الدولار

 حكومات مقالب وطروح ..  اللي يحكم يطلع سمسار

 يجي داير كرشه ولحلوح ..  هبد مافيهم ما تختار 

 ردي متردي والمنطوح  .. حاواشيهم لص وخمار

 وعيني عينك بالمفضوح ..  انصابه والثورات شعار 

وهذا قولي فيه وضوح ..  وقلنا اللي في بلادي صار

ياوطن بين قطيط والسراج

ياوطن بين اقطيط والسراج .. وبين الكبير ومصرفه وبالحاج

 ودستور ملكي من ايام التاج .. وتصميم من لخوان ع التغيير

 يبو يحكمو بالسيف والكرباج .. ومايهمهم كان الخراب كبير

 وبين الدواعش داخلين افواج..  خرب وطنا والوضع صار خطير

 كابرين فيك النار يوم عجاج .. وشاطت معلي من زمان فقير

 وين مايسقم لويها تعواج .. تكالت عليه وداخ كيف يدير

 وين مايضن فحالته تفراج ..  تنغم مش لاقيلها تفسير 

 وين مايكن افج من لفجاج ..  ويبعد على الجبهات والتدمير

 ايجي من وراه الكور والميراج .. وتطلع الجيه ناقصة تحرير 

بدى كل يوم يكر في الباقاج .. في اليل يمسى وفي النهار يسير

 لا ماكله في البطن لا علاج ..  من الصبح يكبش والحياه تقشير

 لا فلوس لا مقبول في الانتاج ..  ولا له وظيفه ولا معاش كبير

 بين الكنايس في حشم واحراج ..  العيله يراجو والنهار قصير

 لكن ادور وتنكسر لمواج ..  بقدرة الخالق بالعباد بصير

 تبعد عروش الوطن م السراج ..  والطيح فيد انسان يبي الخير

 وتبدى العماير فيه والانتاج ..  والامل يبدى في القلوب كبير

 وكل المصائب عندنا تفراج ..  وماعاد لا قناص لا تفجير

 الا فرح بين الخوت وابتهاج  .. من القلب تبدى كلمة التكبير

توجع فيه ايام مضت

يكتب ويفضفض عالنت .. يفسفس ويدز فتغريده 

رسائل وزعها ومشت.. تخفف من همه وتنكيده

 العبره تخنق فيه سكت.. اوين يهدى يبعث ف قصيده 

ابياته بالمضمون روت ..وفيها تنبيهات رشيده 

توجع فيه ايام مضت ..وتطلع م الخاطر تنهيده

 ماني من ناسات خذت ..وشاغلها المال وتلميده

 ولاني من ناسات رقت.. الكرسي غايتها وتريده

 ولاني الي نهتف والنط ..ولاني الي غوي تمجيده

 لكن جتنا ناس خطت ..وزادت في الوضع وتعقيده 

قال الناس اليوم جنت.. عمايل وين تكسر قيده 

وشفنا الي م القهر بكت.. وشفنا الي يدور في فقيده

وشفنا الي يكشخ و ينت ..ويرعب في الناس بتهديده

وشفنا الي انظلمت وعفت.. وحاسب عند الله رصيده

الي كان مهمش عالشط.. بدت عنده في الظلم عقيده

الظالم منا الناس شكت ..وهو فالح كان فتقليده

 شن تبي نفسه وشهت.. مرضيها بالقول وبيده 

بطنه من الزقوم ملت.. وكل يوم بعملات جديده 

وعشناه الوضع المنحط ..وحالتنا في الوطن فريده

 الناس الي عالحق عمت.. وكل يوم يدبر في مكيده 

يخرب كان الناس بنت ..وكل يوم يولع في وقيده 

وفيه الي عالغير عبت ..ولا يحصد لا يلم حصيده 

قاعد فيه الفقر يمت .. علاقه صارت به وطيده 

وفيه الي راقد في الخط ..مساهم في الوطن وتفسيده

وفيه الي بالفخ وعت.. وفيه الي ساهل تجنيده 

وفيه الي في النوم يغط.. النوظه م الفراش تكيده 

وفيه الي بالوضع رضت.. وعالوطنه كاثر تنشيده 

يفرح كانه فيه ضوت.. شوارع فيها الناس سعيده

 تلقاه يلون ويخط.. احلامه في الوطن وتوحيده

 وفيه الي مالخوف بدت.. يجهز لي سفرات بعيده 

رابط باقاجه بسبت ..  وتارك هالوطن وتنكيده

 وفيه الي فلاخير صحت.. اوجعه هالوطن وتشريده 

فركنه داير عشر فوط.. يمسح في دموعه وتكيده

 اوضاع الليبي قال بدت.. ايامه معكوسات شديده

 جيوبه م الدينار فضت ..وفي المصرف مايطول رصيده

امراض خطيره فيه سرت.. وكل يوم فوصفات جديده

الليبي من لمراض يكت.. ومانفعت في الجرح ضميده

قالوله عالخرت خرت ..وقالوله كول السويده 

العلقم منا ناس برت.. ودير الحنضل بيه عصيده 

وقالوله عالناس كوت.. مطارق ع الجناب تفيده 

ملعب منا الناس عيت.. مرض لكن واعر تحديده 

وفيه اللي من النصح عيت.. ومافاد النصح وترديده 

اوعود الي حكموه بطت.. وكل واحد تباع لسيده

 امجهزله عالبعد اخطت.. تجيه على الشبكه في بريده

داخت هالناس فهالط ..  وماحدش جاب المفيده

 الا الرحمه وقلوب صفت.. تناديه وينظر لعبيده