اﻻمه اللي كانت زمان غيوره

شوفة جمال وفتنته في الصورة,, على جيالنا ياناس فيه خطوره

وين مايخش عالنت يبي دوره،،يلاقي جمال يتوّها ينظل 

رجلين ماهي ياعرب مستوره ،،تحاكي فساد ومجتمع منحل 

عرق الحياه شالوه سلو جدوره ،،من غيبته ياناس صار خلل

اﻻمه اللي كانت زمان غيوره ،،على العرض ماتقبل أفعال سفل

اليوم عرضها ينباع بالفاتورة،،ودايرين سوق لعرضها ومحل

بدى عرضنا مغري وله جمهوره،،من كل صوب وناحية ودول

في الفسق ولت ناسنا مشهوره،،قناوات تعرض عالفساد الدل

خذوا من التطور زفرته وقشوره،،ودارو على بنت الاسلام حيل

وقالولها ماتقعدي مقهوره ،،اليوم وقتنا ماعاد فيه جهل

ثوري عليه وشركي دستوره،،الراجل اللي يحكم زمان افشل

اللي كان عنده طلعتك محظورة،،ومانع عليك الباب كيف الصل 

اليوم ﻻبسه متبرجه غندوره ،،الدوري على كيفك فكل محل

طلوعك بكيفك مايبيش مشوره ،،والحكم فيدك والقياد أنحل

نبّي البحر قولي نويت أنزوره ،،مع صاحباتي انقعمزوا في الظل

وتحت العريشه نلعبوا في الكوره ،،ﻻ من يحاسب ﻻهناك فحل

قعد لصغاره والطناجر شوره ،،المهم مايشوفش عليك زعل

مسحتي كيانه بعد كان اسطورة،،بدى بين رز وكسكسي وبصل 

ماترحمي خليك دكتتوره ،،مجرم وتوى في اليدين احصل

خوذي بثار امك وديري ثوره .. والظلم خلي شوكته تنسل

عييتي زمان تقدري في شعوره ،،تلاقيه في البيبان كان أوصل

والبيت يلقى ريحته وبخوره ،،مرتب مساوى عطر وﻻ فل 

وفي الصبح يلقى لبسته وفطوره،،فطينه تذكر كان يوم غفل 

حريصه عليه فغيبته وحضوره،،وتمّل فرزقه والرزين تقل

وﻻهي خلوجه عافنه مطيوره ،،وﻻ بايره ﻻهي امتاع كسل 

وﻻهي قبيحة عافنه مغروره،،وكل يوم مشكل دايره وسبل

اوقت الصيام تصيم في عاشوره ،،وشوال والوقفه مغير مهل

وتحسب أيام الشهر وقت اظهوره ،،وتعرف اللي بعده نهار يهل

وتحسب ثلاثه في الشهر مذكوره ،،أيام بيض هلي صامهم ماظل 

ويومين عند العامه مشهورة ،،يوم اﻻثنين الخير فيه نزل

ويوم الخميس اذنوبنا مغفوره ،،وهكي المرا واقع وموش أقل

ونبوا ضنانا اليوم يفهم دوره،،وبالعمل يلقى للمشاكل حل

ﻻالبنت نبوا وضعها محجوره ،،وﻻ عاريه منها الشباب جفل 

في وين مدعك شاده طابوره ،،وفيه التغنج والكلام عسل

تمجلق مع شلة شباب اذكوره،،اللي بينهم شرع الكريم فصل

قوارير لكن كأنها مكسوره،،ماحد بيها ياخوان قبل

تقيم الشريعة نهجها مشكورة،،أوقت الصلاة مايفوت كان دخل

وكان فيه حاجه هامه وضرورة ،، ولّا زياره لقراب  الهل

تطلع وتقضي ظرفها مستوره ،،وتزور وتسلم عللي  يحل،

وياما الهوادج  يقطعوا في بروره ،،منين قبل هلنا يرحلوا عالبل،،

وباصورها متقنطات سيوره ،،فيه المره تناسق فوق جمل

مش فيلو متكشفه منشوره ،،وعارضينها فرجه عليك عمل

في كرهبه سواقها مايعوره ،،رضى بالشراكة وطاب بلي افضل

عليك وقت دوخنا بدى فزوره ،،يخلي بنادم في الكلام يزل

يقول قول يجرح بعضهم في شعوره،،على الله نقلوا عذر فلي وصل

والناس تقبل قولنا مسروره ،،وتنصح اللي في الغافلات أوحل 

والنبهوا من وقتنا وشروره ،،وحمل الجماعه ريش كان أثقل

ونصح الضنا ينفع يجيب الدوره ،،وتاكل ارطب كأنك غرست نخل 

شيوخ سماح تقعد للعرب

شيوخ سماح تقعد للعرب …………تقاني خبل مصعب قناه 

وكانه الطبل  في الشده ضرب ….اتجيه الخيل تستف وراه 

وكان رفع  بيديه وطلب ………….نصر الله ياتي من دعاه 

وكم من وقت عالناسه اصعب ……..وشح الغيث لحكمة الله 

وجف ترابنا ومات العشب……..وفيه البعض من خوفه جفاه 

ضم البيت وجماله اركب………….وقال الوطن مولانا بلاه 

وباقي الناس كافح ما غلب…………..عطاه الله وايمانا كفاه 

رزاق الناس ما عمره نهب ……فضيق الوقت ولا في رخاه 

يجو للشيخ من الجامع قرب…….توضى ودار جرده عالقفاه 

نضيف عفيف ما عمره كسب……كان حلال من عرقه جناه 

ايصيم ايام ومعاهم رجب……….يقيم الفرض والسنه امعاه 

شريف الاصل للطيب نسب……….طلب الله ما خيب رجاه 

جعل الله دعواته سبب………….حرك غيث في عالي سماه 

وجت سيول تدلفق عجب ……….والعطشان من خيره سقاه 

رويت لرض والعابر شرب ………ولصلاح ميخيبش الجاه 

اماجن فايضه تملى القرب ……..والحيوان في الوادي ملاه 

والنيران تاكل في الحطب ……….لسان النار ماعمره  طفاه 

بيوت مبجده ما هي خرب…….يراجو الضيف ويحبو رضاه 

ينوضو الفجر في خير وطرب…..بكور الخلق والبركه معاه 

اللي مقيول في السنه وجب ………….ولي قامها ربي عطاه 

الله الله في صحاب النسب …ان شاء الله الخير في جملة ضناه

شفطوا شفط

شفطوا شفط ماخلوش حاجه .. وزاد النفط متوقف انتاجه

أخرب الوطن يامصعب اعلاجه .. فيه ضناه يلعب بالرزين

موت وهم ويغبر عجاجه ..فخامس عام هنا ماشيين

فيلم رعب متنسق اخرجه .. فيه الناس بالعبره تنين

شلنا الظلم وكسرنا امواجه .. لكن كف جانا باليمين

يانفس دختي ورافعاتك حيره

يانفس دختي ورافعاتك حيره ،، مش قادره ترك المعاصي ليش

يانفس تمشي في دروب خطيره ،، ﻻيفيد فيها شد ﻻ تكريش 

ظلمه مسالكها عليك كثيره ،، سوده طليس وزيها مافيش

فيها مهاوي واسعه وكبيرة ،، ﻻتنسكن ﻻيطيب فيها عيش

اللي جابنا ليها ذهاب الشيره ،، ورفقة اللي عاصي ومايصليش

ﻻهناك من يرجع وينصح غيره،،يوري اللي غافل ومايدريش 

ويانفس رهو الشر ساهل ديره،،والعافنه للفم ماتوليش 

تكبر وتنشرها أفام نكيره ،،متعوده عالنهش والتنتيش 

الشيطان كانه طق ببناديره ،،تبدى عليه معرشه تعريش 

ويانفس ردي ومسحي هالسيره ،،وتوبي على فعل الخطا والطيش 

راهو عذاب الله شين سعيره ،،منه النجا ينفس ماتعبيش 

جهنم يرعش هولها وزفيره ،،التوبه اللي بعدين ماتنجيش 

وجنودها مايرحموش الجيره ،، والكذب والتلويص مايمشيش 

ويارب ترشدنا الطريق الخيره ،، ويانفس شور الحق ماتخطيش 

وقري الكتاب وراجي تفسيره ،، وماتقلقي مالبحث والتفتيش

ويانفس نعرف داخلك شريره ،،وبليس عندك رتبته شاويش

ولسان قاطع فض في تعبيره،،والخشم راقي رافعه تكويش 

والعين مخزنها اجمام ذخيره ،،نظرة على نظره بلا ترميش 

والقلب يفسح في المجال لغيره،،ومرات يشكي هالخطا مايجيش 

والوذن طرشه من قداه ضريره ،، تبي الحان وعزف وتفرفيش 

وكل الجوارح راضيه ونصيره ،،اﻻ العقل لكن صارله تهميش

تكالوا عليه وداخ في تدبيره،،ماعاد يقدرهم بدوله جيش 

وقاعدين بين الغزل بين النيره ،،تلخبط الخيط وصارله تكميش 

وهاذي نصيحة ياخوان صغيره،،عبر اﻻثير لشخص مايبيش 

يرجع يتوب وينتبه لمصيره ،،كان نجت مالحجب والتشويش 

بلكش يصحى ياخوان ضميره،،شور المعاصي دوم مايوليش

يمنوا في الشعب المسكين

كل مره يهدرز علينا صديق ويبعث فينا الامل ويقول ان الخير قادم لا محالة 

لكن بعد هالابيات حسيت روحي متشائم هلبه وارجو ان اكون جانبت الصواب

وما ذهب اليه الاصدقاء هو الصحيح وان اماني هذا الشعب ستتحقق قريبا

ان شاء الله وان هذه الابيات ستكون من الماضي ...

يمنوا في الشعب المسكين،،بخيرات تجيه بلا حد

أحلمّ لونه في دورين ،، وقصر مشيد فيه رقد

وراتب في احدود اﻷلفين،،يبزعك ويبذر ويسد 

ولي يطالب فيه بدين،،عطاه فلوسه كاش وعد

منغنغ والملبوس ثمين،،ويستورد من كل بلد

وعنده في القاراج خزين ،،مستف سيارات أجدد

عبيده فوق من العشرين،،ويدوي بسوفه ولقد 

وطباخه من الفلبين ،، ومساعد طباخ يمد

ويسوح من وين ألوين،،زهاوي ما عاد فيه فدد 

استاقظ يلقاهم صفين،،وكل واحد للاخر ضد

رقت فوق الراس دخاخين،،ودارت فوق الوطن عمد

سلاح يقلقع دار رطين ،،اصوأته في الحيطان تهد 

هذا يرسل فيه رزين،،وﻻخر متوتي ويرد

وشرين في عينه سكين ،،يعيط في راسه ويشد 

شضيه اللي جاته في العين،تبصر نور العين فقد

ولخره جاته في الركبين،،بيتحرك لكن ماقد

ملوح بخته جى نصفين،،البر الشرقي فيه أولد

وفي الغربي عنده بنتين،،ونسبه بين الخوت وجد

الحاصل هالست ملايين،،عداوه والمضمون أفسد

ويطاشن زيت الطاجين ،،لهيبه ساخن ما ينشد

ولا حجنه لافيه ايدين .. الا يغلي ما يوم أبرد

ومازلنا هانا حيين،،اراجوا لكن زاد أبعد

الخير القادم زعمك وين،،وين اللي صرح ووعد

اليوم الخاطر تم حزين،،وبو سرحان حذاه امتد

ازوج من ثلث نساوين ،،تكاثر في الحومه وولد

بنا بيته دار تراكين ،، احباله في القرطاس عقد

يبي يدير اسناح حصين ،،يدقق في اماثق وعمد

شكله يبي عشر اسنين ،،عشير ومرات يمدد

ولزانه خراف زنين ،،معانا ماضنيش اتشد

وربي يصلح الحال

ياما فات

ياما فات ،، من العمر يمكن باقيه ساعات

ويمكن ثواني تنقضي ولحظات،، ولنك مسكت هافته لنفاس 

يحطو على قلبك السمعات ،،ويلقوه واقف مايدق خلاص

الدكتور أشر دار توقيعات ،، منا الرجاء مافيه كان الياس

وتنشال لحجرة التلجات ،، عريان فيها ماعليك الباس 

ويتم تغسيلك على لوحات،،وتلبس كفن بالميترو ينقاس 

وبعد الصلاة تنحط في الساحات،،تصلي عليك صفوف من هالناس

وتنحط في حفره يقولو مات،،عليك حاطين من التراب اكداس 

يديرو عليك احزان وعياطات ،،الشارع مسكر والخيم ع الساس 

وترحل بلا رجعه مع اﻻموات ،،وتترك وراك المال والباﻻص 

اللي بترفعه المعروف والسيات ،،ظلمه بلا صاحب وﻻ ونّاس

ﻻحكي ع النقال ﻻ عالشات ،،وﻻ همس ﻻ ع العام ﻻ ع الخاص 

وﻻهناك موسيقى وزمزامات ،،وﻻعاد تمشي عالوطى بمداس 

اﻻ نيتك والعمل بالنيات ،،تنجيك كأنك ماظلمت الناس

وكأنك ظلمت الناس بالميات ،،وطبعك خبيث ومنهجك قصقاص 

يوم الحساب وشدت الغصرات ،،يزيدوك فوق من اﻻفﻻس افﻻس

انزيدك رصيد وشحن

في قروب اشعار اولاد ابوسيف نشر الاستاذ بشير احمدعبد النبي ابيات شعر لشاعرنا

الكبير على النعاس يقول في مطلعها :-

نزيدك رصيد وشحن يانقالي ... مادام للعزاز اتقل في مرسالي

ثم اضاف اليها 

ديمه ديمه ... نزيدك رصيد وشحن فوق القيمه ما دامك اتكلم من نبي تكليمه ... وما دامك اتبشر من نشد علحالي انصونك وما عندي عليك عزيمه ... ونسلف عليك انكان جيبي خالي

.........................

وشارك الشاعر عبد النبي ابو سيف:-

عندك عاده ... كل يوم تطلب في رصيد زياده

يصرف عليك الشخص كيف اولاده ... يا ما امخلي من جيوب خوالي

ومرات شحنك ينخفظ عداده ... تفصل امنين الهدرزه تحلالي

..................

وشارك الشيخ بشير البشر:-

انزيدك شحن ... وتبدا اتهاتي بي انغام ولحن

وكانك عطلت انشاوروه الصحن ... الشبكه اتجيب جواب ليه سوالي

اتقول صار في اخطوطك خراب وسحن ... كما صار بعد دراس للجلوالي

ما نيش ناقص مال ... وغلطو اللي قالو علي نقال

انا كتاب فيه العلم ليه مجال ... ودروس فيها عبر للاجيالي

علاش ياحبيبي الدور الموحال ... وتطري علل ماهو على منوالي

......................................

وقال امبيه الامين:-

انزيد رصيدا ... بلا وعد نشري الكرت لتجديدا

امصيريف جيب جديد جابا سيدا ... قسمه على الله زي فراد عيالي

كل عام بي نحرق كروت عديدا ... امغير فوت يا لول يجيك التالي

......................................

واحببت المشاركة في هذه الملحمة الطريفة

فكانت هذه الابيات:-

نشحنك في الليل،،وخوذ راحتك في الشحن بالتطويل 

وفي الصبح نشريلك رصيد ثقيل،،خمسات يمكن عشرتين اجمالي

وبعد الرقام انديرلك تفعيل،،ونبدى انتواصل بيك ياجوالي

انفسفس ونكتب لصحاب اميل،،ولي نشدني انقوله عالحالي 

ولي عجبني انديرله تنزيل،،وتبدى مفلفل هدرزه وتسالي 

انتابع الكورة فيك بالتفصيل.. خصوصي الريال وهرجة الشوالي

وﻻبيع نرضى فيك ﻻتبديل ،،مابين جيبي ومكتبي ودﻻلي 

نازك وشكلك في اليدين جميل،،عليك جلد يرهج سمح من فيﻻلي 

وكان طحت وﻻ صارلك تعطيل،،وﻻ اصواتك تنخفض مالعالي 

مايفتحك صﻻح كان وكيل،، ويكون اصلي ويفهمك طوالي 

فني وعنده فاﻻعطال دليل،،يردك جديد ونغمتك تحﻻلي

مشاركة في قصيدة الاخرة

خطرو على بالي كلمات وانا نعاود في قراية قصيدة المرحوم باذن الله سي عبد الحفيظ

ولي يتكلم فيها على الاخرة قلت فيها ...

هاك رحلت،،قدى اﻻخره في دارها حولت

وياما عليها في اﻻشعار سألت،،وتنشد على سكانها وشجرها 

واليوم فارقت الحياه ووصلت،،عرب سابقاتك وقت لمقابرها

الدار لوله في القبر وأنت قلت،،طريق ماره ﻻزم يكون سفرها

سافرت لكن عندنا مازلت،،انقول في اشعارك دوم ونكررها

وفي دنيتك مظلوم وتحملت،،وخضت الحياه بأنواعها وخابرها 

قليل حظ في الصحبه وماحصلت ،،صاحب يرد الباهيه يقدرها

غلطوا وسبت الحق وتنازلت،ووصفت في اشعارك اللي ناشرها 

قوافي وحكمة رائعة فصلت،،وامثال بعدك جيلنا يذكرها

أصحاب الخطأ بالباهيه عاملت،،تسامح وما تنشد على مصدرها

شاعر تقول الحق ماجاملت ،،وﻻحد يقدر كلمتك ينكرها

قصائد على الوديان وتناولت،،فيها امجاد وفرسنه مكثرها 

وﻻ وين يبو جيتك ماطلت ،،فيسع تلبي ماتجي في أخرها

مثلت ناسك في المحافل نلت ،،جوائز اسمعنا في العلام خبرها

واليوم يابوخال ماقابلت،،فاهق كبير وغيبتك موعرها 

الله يرحمك ياخال ماطولت ،، رحيلك احزان انفوسنا كدرها 

لكن أقدار وساعتك كملت،،وماحد يرحل كان مايقطرها

(هناش من مشى للاخرة زايرها ،،وبعدين يبيرجع يجيب خبرها)

اللهم اغفر له ورحمة واجعل مثوه الجنه انك على ذلك قدير وبالاجابة جذير

قولوا اميــــــــــــــــــــن

الاخرة وخبرها

هذه القصيده للشاعر المرحوم باذن الله تعالى سي عبد الحفيظ بن حديده

يتكلم فيها عن الاخرة ويذكر فيها بساعة الرحيل وعلى العموم القصيده

من الروائع التي تركها شاعرنا خاصة ربعها الاخير ومافيها من حكمة

و نظم يرقى الى مستوى كبير جدا ولا اخفي عليكم انتقاد البعض لتفاصيلها

من الناحية الشرعية والله اعلم

(هناش من مشى للاخرة زايرها ،، وبعدين يبرجع يجيب خبرها)

يسلم على بابايا ،،وشن حال جدي وحالها جدايا 

والوالده ماكيفها ربايا..زعم وين مولاي العزيز حشرها 

ولناس في ماضي الزمان معايا،،توارت على الحيين ماننظرها 

عليهم مجدد بالنحيب بكايا ،،وحتى مشت مازلت متفكرها 

حسيت في وصت الضمير وجايا ،،فرقت اعزاز العقل مايقدرها

هناش منو دار زياره ،، ومنها رجع وأكد صحيح اخباره

يحكي على عالم خفي بسراره ،، وحاجه علينا خافيه ظهرها 

فيهاش من تاجر وجاب تجاره ،،وشن دايره التجار في متاجرها 

ادهور وشابح سوقها واسعاره ،، جميع البضائع سعرها سعرها

في شي يصعب على المياره ،،ضعيف حالها وزاد الغلاء كدرها 

وفيهاش سلطه ومحكمه ووزاره،،وقضاتها جلست على منبرها 

نور الحقيقة ماخطوش اشواره ،،تخاف وجه من عادل وﻻيعذرها

فيهاش ناس غنيه ،، دارت قصور وكاسبه ماليه

وفيش ناس عاشتها حياه دونيه ،، والفقر ديمه ماخطاش قطرها

وفيهاش من دايل وفيه رعيه ،، وحكام ترجى الناس في أوامرها

بقوه كبيره وآلته الحربيه ،، اعداد بالملايين جندت عسكريا

اتكون تحت قايد كلمته رسمية ،، وبيها غزى دولة عدو كسرها

وفيش منو صانع قنبلة ذريه ،، وناوي جميع البشر يستعمرها

هناش منو داير دوره ،، نوى قصد عالم ﻻخرة بيزوره 

يدهم جهنم كانها في شوره ،،ويرقب على حالة عذاب كفرها 

عصوا قول ربي ماخذوش أموره،، فوق من لهايب وهجها جمرها 

قوي صهدها بأمر القوي مكبوره ،،وملك خزاين نارها كابرها 

يالله راك تجيبنا في طفوره ،، وقادر علينا تبعده سامرها

من لسفر يتعنى ،، يزور ﻻخرة ويشبح قصور الجنه

يشوف صنع معماري غرايب فنه،، قادر قدير بقدرته صورها

نول جميع العقل مايتمنى ،، تنشق روايح عطرها وزهرها 

ياسعد هلي طالها وتهنى ،،كلى من لذيذ اثمارها وخضرها 

عزمنا على المسقاد ﻻزم منه،،كما جيال رحلت قبلنا مكثرها 

فروض من مفروض الله ماهي سنه،،يزيد في اعمار الخلق ويقصرها 

وسيع المخازن خيرها مامنه ،،يغني الفقاره ولغنيا يفقرها 

عبدك طلب في رحمتك يستنى ،،سيت جميع المسلمين اغفرها

هناش من قصدها زاير ،،ومنها رجع وأكد وجاب اماير 

بالصح يحكيلي على ماصاير ،،يزيد شرح يشرحلي على امايرها 

طول الحياه عنها دليلي حاير،، ويسهل على من شافها ونظرها 

فيهاش زعمه ياسرين عشاير ،،بلا اعداد غير الله مايحصرها 

ويازعم هلها صافيين ضماير ،،وﻻ مثايل ناسنا منكرها

يازعم كيف الدنيا ،،فيها فقير الحال ولي غنيا

وفيهاش ناس بكسبها معتنيه ،، وتجري نهار وليل عالخاطرها 

ومازال ماوصلت احدود المنيه ،، وﻻمنو ساعات الرحيل فكرها

يجدد ويبني في منازل بنيه،،ونفسه على الفاني كثير غررها 

وفيهاش من فلح حرث في حنيه ،،سنين وادها واتا غزير مطرها

فيهاش هلي شارق ،،ويجري على شان المكاسب عارق 

بغى يلمها بسيف ماهو فارق ،،بين الحلال وحارمه دردرها 

وفيهاش من مجرم خبيث وسارق ،،وجاهل مساهل دينا ناكرها 

وفيهاش هلي في زمانه مارق ،،ونال كل حاجه في الضمير ضمرها

فيهاش هلي واصل ،،جميع ماتمنى العقل بيه استاصل 

عطاه خالقه وخيره عليه تراسل ،،سعيده حياته بالهناء طورها 

وفيهاش هلي في المشاكل حاصل،،بغى الفايده روس اﻷموال خسرها

في الفريق ولاله مقاته باسل،،دهره عكس والطيبه مررها

هناش من مشى يجول ،، قدى ﻻخره ناوي السفر ويعول

وبعدين يرجع مايبيش يطول،،يشوف ناسها ويحكي على منظرها 

وبالكش راهي تعجبه يتحول،،ويرتاح كانه ناسبه موكرها 

ﻻيقول قولت قال ﻻيتقول ،، وﻻ يدير باش الناس بيكدرها

ﻻوشوشه وقريضة ،،وﻻحسد عنده في العباد بغيضه 

نقي قلب والنيه نظيفه بيضه،،ونفسه قدى شور الهدى شورها 

قضى ساعته وتمت عليه فريضه ،،طريق ماره ﻻزم يكون سفرها 

حنى اليوم هاهي واسعه وعريضه ،،الدنيا غرقنا في غريق بحرها 

وناس يساره غفلت بلى توقيضه ،،وراحت ذهيبه وفكرها ودرها

فيه بعض راح ذهيبه ،، داير مقاته الوشوشه والغيبه 

فاكر عيوب الناس ناسي عيبه،،وسيات غيره للعباد نشرها

في الوجه تبدى صاحبه وحبيبه ،،حفر سو في تاو الغياب حفرها

ايجيك وقت مصلحته قداك تجيبه ،،ويجفاك كأنه حاجته صوقرها 

ويضل واتيلك على التزيبه ،،بماس من ماضي رهيف شفرها 

وياصاحبي كسر القلوب صعيبه ،،وتجبيرها واعر على كاسرها 

كون نبه وجعلك اوصول وهيبه ،،ورجلك على أصحاب الخطاء قصرها

انوصيك شد مكانك ،،وصون هيبتك وكمش عيوب لسانك

كيف مايقولوا القايلين احصانك ،،بميزان فضه كلمتك عبرها

ولصحاب تسعاهم بكثر احسانك ،،على قيس مفعولك تنال قدرها

وعامل عموم الناس كيف اخوانك ،،وداري جميع عيوبها وسترها 

بودك تود الخير لجيرانك ،،ودير واجبك بالطيبه عاشرها 

كلام سو راهم يسمعوه اوذانك ،،وبيبان تجلبلك خطى سكرها

(هناش من مشى للاخرة زايرها ...وبعدين يبيرجع يجيب خبرها)

بمناسبة مئوية المجاهد الشهيد

بمناسبة مئوية المجاهد الشهيد

سي محمد بن عبدالله البوسيفي

عرب يعرفوا قيمـــة الوطن  ،،  كانــا نده جايينـــــــا
مايغيبوا ساعــة الصفـــــــر  ،،  وتاريخهـــم كاتبينـــا
فـــراسين ردادت الظيـــــــم  ،،  وعقيلهــم حاميينـــــا
فراسيــــن مايوخروا شبـــر  ،،  يجوا للعـدو قاصدينـا
والضرب في الراس والصدر،، بيديـــن ماهــي رزينا
تربوا علـــــــى العز والقدر  ،،  من جدودهم وارثينـا
عرب يكسبوا السود والحمر ،، وعنانــــها طالقينـــــا
إركــابه ذهــــــب بالمعاييــر  ،،  برجلينهـــم دايسينـــا

والبــــر مليـــان بالخيـــــــر  ,,  ومنطــاع لحاكمينـــا
وديانهــــم قمــح وشعيـــــــر ،،  وبيــت الكــــرم بانينا

سفـــــرهم مراحيـــل بالقود  ،،  وفــج الخـلاء ماشيينا
وكــان طــق للحرب بنديـــر ،،  ســوق البلا ﻻهديـــنا

فـــي الوجه ما يعرفوا غدر  ,,  ولا تجيش منهم الشينه
انجـــوع زيهـــم  ماليا البــر ،،  وبيوتهــا تبـان زينـــه
لكــــن المفعــول والفـــــرق  ،،  أهـــل الكــرم ساكنينا
ضناهم علـــى الشرع والدين ،،  مــــن الزاوية قاريينا
وشيابهـــم بيهـــم الفخــــــــر ،،  مــولى الخطـأ رادينـا
هضوك مــــــن عقبهم بطل  ،،  اللـــي آرخوا امجدينـا
جاهد وميهــاب فــي الموت  ،،  ضربه على شبح عينا
ومش كــل سكــان هالوطن  ،،  يفـــــدوه ومحصنينـــا
فيــه بعـض يفــدوه بالروح  ،،  وبعض العـرب بايعينا

والشيـــخ معروف بالصبـر  ,,  عاطي حياتــه رهينـــا
الطليـــان عرفـــوه صنديـد  ،،  يبـــي لزهـــــم فاهمينا
رفض كل دعوات للسلـــــم  ،،  ومبعوثهـــم  ﻻزينــــا
جواباتهــم طــول لجمــــــر  ،،  وكانونهــــم واقدينــــا
عطى عهد لين يكمل العمر  ،،  مانصالحــوا غازيينـــا
ولمـد عربنا مع الفجـــــــر  ،،  وكــل حد وتى عوينـــا
فراسيـــن ردادت الثــــــأر  ،،  وشمل العــرب ﻻمينــا
قـدى حزمة الشر والكفــر  ،،  اللــي وجودهم رافضينا
وهـدوا عليهــم مـع الفجـر  ،،  وعياطهــــــم سامــعينا
لكــن مقاديــر وعمـــــــار  ،،  والروح ما هيــش لينــا

وديعــــة القـــادر الجبـــار  ,,  وسنـه فرضهـا علينـــا
سمحمد انصاب فــــي الكر ،،  هـــذا اللـــي عارفينــــا
الطليان فرحــان بالنصــــر ،،  وشيخ العــــرب فاقدينا
لياليوم مانحط فــــي قبــــر ،،  وﻻ نعرفــوا دافنينــــــا
خبر عاوده اكبار في العمـــر  ،،  اللي بعضهــــم حاضرينـا

كرامـــات لشيـــخ واســــرار  ,,  ومعـــروف هالســر فينـــا
وتاريـــــخ للشيــخ يذكــار ،،  اللــــي وﻻدنا ناسيينــــا
الله يرحمـــه ليــل ونهــار  ،،  ماخان ﻻبــاع دينـــــــا
ويبارك فهجمــع لخيــــار  ،،  وجعل أخطاهـــــم متينا
واللـــي مسبـب فهجمــــع  ،،  وشاقـي وعــول علينـــا
يالله ياخــالـق الكـــــــــون  ،،  ينالــوا شفاعـــة نبينـــا
عليهــم النعمـة بلا كيــــل  ،،  ومشوارهـــم رابحينـــا

نبي فزعتك ياشعر

(نبي فزعتك ياشعر هات قصيده،،مليان صدري واﻻبيات عنيدة)

هذا بيت شعر يقال في اكثر من مكان واحببت المشاركة

على نفس السياق فكانت هذه الابيات

قوافي تقول ،، وترسم مصائب صايرات وهول 

وكيف وضعنا ياخوتنا مشلول،،وهالشعب حكمه اليوم ماهو بيده

كيف قبل واحرف حالنا معزول،،كانش الراية وطنطنة نشيده 

متشردين اليوم رابع حول ،،ﻻ خير شفنا ﻻ أيام سعيده

مابين خبزه ونافطه وشيول ،،يلهد علينا سرسري بجريدة

وثارات بين الخوت للمقتول ،، ومابين خانب في البنوك رصيدا

ثارت الناس ورأيها مجمول ،، والوطن يفخر دوم بصناديدا 

خلوا الكراسي ملكها مقتول ،،ولزوا الحواشي المالكه وعبيده 

لكن بعدها خالفوا لوصول،، وبيدين سوده ناويه تشريده 

عصابات وﻻ وطنا وفلول ،، وعقبوا كبار العز وتقاليده 

ولي على حاﻻتنا مسؤول ،،وزايد على هالوطن في تنكيده 

قناوات ترسل دعمها مجهول،،وين جرح باري تعطبه بحديده 

اللي دايره لعلام مش معقول،،وكل يوم تطلعلك أصوات جديده

تفسد تخرب كان فيه حلول،،على الفيس وﻻ يبعثوا تغريده 

تجي في خواطر ناسنا ويزول ،،كل امل للحوار ومواعيده

وتبدى المحاور بعدها عالطول،،نار شايطه متنوعه وشديدة 

والمثل عند اكبارنا مقيول ،، اللي نذل ماتنفع معاه وديده 

مجهز فجيبه كمرة المحمول،،يضخم مواقف والخلاف يزيده 

الله يجعله في الفانيه معلول،،ويقصر على جبدة غطاه تكيده 

والباب هلي يقصده مقفول،،وأجعل عليه اللي حذاه بعيده

وعنده وجع مايهفته بندول،،وﻻحقن تنفع صبها في وريده