ريت الكلام اللي يقوله

ريت الكلام اللي يقوله بنادم ......يكون وازنه ما يكون بعده نادم

اوزن كلامك باهي................وكن نبه ماتكونش ركيك وساهي

وافطن لروحك ما تكونش لاهي.......وقدام كل الناس فكرك عادم

راهي المذاهب دايرات نواهي......ودير حسبتك في كلمتك للقادم

وما تنشغل بالكارته والشاهي......ترافق كروكه ضايعين شرادم

مادير زي كمشة شباب مقاهي.............يفاجيك هلي للملذه هادم

والنفس تمشي لجهنم راهي...........كانك امذهب للمعاصي خادم

ياكرهبه فكرت

ياكرهبه فكرت في بيعانك .....تملحت وركبني الفلس عالشانك

سومك هلبــــــــــــــــــه  ..............فيك باتريه وقومه بالطلبه

وفيك ردتوري من سنين الحلبه......لاضي لايسكرو بيبانـــــك

ما فــــاد فيــــك عنـــــــاد ...................الهيكل تهرد والمحرك باد

وكل يوم نرفع فيك للحـداد.................يرقع فجيهة زومتك وركانك

قلع من جنابك ماتراب غراد................وفوت ثلاث ايام  في لمانك

وبين العجل رقع شوي بياد..............نسى النار جيهة طوبو خزانك

رقت نار في وجه وشاف سواد..........مع الخشم والريه رقى دخانك

ستاقض طلع يجري نده لعباد ................يبي الجماعه يعجلو دفانك

وجت دفتك في كدس شين رشاد...........فقابينتك ولعت رقت نيرانك

وصرتي كديس مهبيه ورماد........ما هناك حاجه تنتهض في مكانك

بدت قصتك لناس في الميعاد.............وكيف الجماعه حاولو غمانك

وكيف قدر المولى عليك وراد..........يعوض عليه الله في فقدانـــــك