شتاحشتكم ياهلي

شتاحشتكم ياهلي ﻻ تنسوني .. بأمر الكريم انزوركم وتجوني

شتاحشت لمة ناسي .. في غيابهم حسيت بيه نقاصي 

هم وضناهم ساس يسند ساسي .. من بعد رب الكون هم عوني

اليوم في الحيوط الخاليات انواسي .. ترجع صدى صوتي وماﻻقوني 

اﻻ يابسات العرف كيف ايباسي .. الشجرات هلي حالهم بكوني 

ناس يحصدوا في زرعهم طباسي .. خياﻻتهم في اللبط بين عيوني

ومن بعدهم خالي اليوم ادراسي .. الفيران ملكوها المنادر دوني

ومن بعد مابعدو أعلنت افلاسي .. ومن بعدهم متكاثرات ديوني 

والقصد موش المال ﻻني انساسي .. لكن اشتت شملهم وجعوني 

والفقر فقر الخوت شلم فاسي .. واثر على الصحة وبدل لوني

اليوم برهم كان الجبال رواسي .. اللي يعرفو خطواتنا حسوني 

اجبال مانسو جيرانهم من ناسي ..بلا قول عن جيرانهم نشدوني 

حسيت حن ترابهم في امداسي ..وقزقاز جابه الريح بين سنوني 

وغمضت عيني مانفضت اللباسي .. من الرمل مانك من رمال تهوني 

وقعمزت حسيت الوجع في راسي .. وناديت بالك يسمعو ويجوني 

لكن اوهامي فايتات اقياسي .. اواقع البر وخلوته صحوني

حفيان وﻻ لبستي عفاسي .. وراكم بنمشي وين ماتخلوني 

وياريت توصل نبرتي وانفاسي .. تجيني ردود تقولي سمعوني 

وياريت شجرة فخاطري واحساسي .. تظلل عليكم ياصبي عيوني

وياريت لمه في خيم وكراسي .. في فرح ملمومين وتنادوني 

بازين يبدى وكسكسي في تباسي..وناس شبحهم حرك خفى مكنوني

وتبدى الرغاوي مكشكشة في طواسي .. بلا اعداد بعد الثالثه تعطوني

ويحلى معاكم في الخبر مجلاسي .. ولصبح ما نفارق دفى كانوني 

ويالله عالم نيتي واخلاصي .. تلم شملهم تقطع جميع ضنوني

عشاهم معاقبة ليل

ايام كان سي محمد كبير قلبه بصحته كان لا تمل من مجالسته وهو يسرد الاحداث 

والامثال والشعر نسال الله له الصحة والعافية 

كان يعيد علينا بيت يقول فيه 

عشاهم معاقبة ليل ** وغداهم من الظهر غادي

ويارب تمم على خير ** لين نوصلك يابلادي

وفي محاوله لزيادة عدد الابيات كتبت بعد البيت الاول بعض مايمكن ان يناسب 

قوله وختمت الكلام بالبيت الثاني :: ـــــ

عشاهم معاقبة ليل .. وغداهم من الظهر غادي

وميعادهم قال والقيل ..ويكالهم في النوادي

والراي عند العواويل .. اللي تحت صف الاعدادي

تشوف ناس تحلف مهابيل .. العيب عندهم شي عادي

ضناهم يباتو مساطيل .. مع كل طبال شادي

غرايب تفشت فهالجيل .. والظرف جاهم امقادي

نسو بر حلو التفاصيل .. اللي هام بيهم افادي

بروحي انشاوخ بلا حيل .. بعد عقبتي من اندادي

جوال مانرقد الليل .. قليل وين نالف اقعادي

واليوم للدمع منديل .. انكفف و قاصر قيادي

بدى الليل مهموم وطويل .. جلى النوم فرقة ارقادي

مع من ابنحكي التماثيل .. وما حد يفهم اقصادي

ولا يعرفو طفرت السيل .. ولا زرع يطفح فوادي

ولايعرفو عرم لا كيل .. ولا دراس في عون هادي

ولا قافلة تحط وتشيل .. مع الفجر طبع البوادي

ولا ادلهم نجمة اسهيل .. ولا يجاوبو في المنادي

ولا يعرفو زيت وحويل..ولا جرد سمح العقادي

ولا ود مالي الشكاليل .. ولا صانعات المسادي

اوين الرحى والتغربيل .. اوين العمد والاوتادي

ولا خرت للي معاليل ..ولا جرح يبي ضمادي

ولا كوي لا شيح وكليل .. ولا فخرج مصرور زادي

رحل وقت ناسه منازيل .. في كل رقراق بادي

تريس عز ماهم تنابيل .. يقولولهم يا سيادي

ناس يلعبو فوق مالخيل..و الشاش وام التقادي

ولا يعرفو بخ موزيل .. ولا ياكلو في الزبادي

ويارب تمم على خير .. لين نوصلك يابلادي

اللي بسملك بسمله

اللي بسملك بسمله .. حتى انت عندك تبسيمه

ولي يشقملك شقمله .. حتى انت  عندك تشقيمه

ولي فيك مدير عمله .. وطبعه خايب ديمه ديمه

سوس ومتقفيها جمله .. وراقد في قعور البشيمه

عايش في راسك ز القمله .. ودمك داير بيه وليمه

حسنله راسك وبرمله .. راهو ماتجيباش حشيمه

مايثمر مهما تقدمله .. راهو يشبح فيك غنيمه

وفيه اللي مشتت شمله .. مطرف جاي ف قريمه

ماحد احذاه يولمله .. لا من رد عليه ظليمه

لانسبه احذاه تخممله .. حتى اللي في البيت ايتيمه

وفيه اللي عروقه في الرمله .. يراجي في القطره من الغيمه

وفيه اللي من الغارق يملى .. وفيه اللي يحلم بجغيمه

وفيه اللي يكركر زي النمله ..وفيه اللي مسكر بزيمه

 القبلي كان جاك تلثمله .. لين البحري يهب نسيمه

ولي يقدملك قدمله .. وخلي يديك معاه كريمه

وكان جاك فحاجه كومله .. وخلك في الميعاد نديمه

ولي مداير ضدك حمله .. ومتمنيلك شر هزيمه

وتي روحك وتحزمله .. وماتكونش من ناس غشيمه

وفيه اللي يحلم تخدمله .. ومداير فيك الشكيمه

دوم يحط عليك فحمله .. وبعد الحمل يحط السيمه

ارقدله رقده واحلمله .. حلمه ما تنطاق ذميمه

وفيه اللي لازم ترشمله .. باش منك يفهمش كليمه

حط المحراث ولجمله  .. فركن الجبادات صريمه

ولي فعله تتحشمله .. ومش داير لروحه قيمه

موته بين الناس ارحمله .. لايندي لا يحس شتيمه

وهكي الناس فراد وجمله ..عوجه ومنها بعض سقيمه

فيه اللي جاهل ترشمله .. و فيه اللي كمل تعليمه

 وحال الدنيا ماتسلمله .. يبي في الشدات عزيمه 

خوكم يعيد

خوكم يعيد وقبلوه سلامه ،، كل عام وانتو بخير ياحيين 

بالكش تلقو فايده في كلامه ،، وﻻ تقولو من وراه امين

الله ياكريم الوطن حيد ظلامه ،، انشوفو ضنى هالوطن متفقين

على قلب واحد رافعين اعلامه ،، وخيار وطني فيه مسؤولين 

ولينا رئيس حكومته قدامه ،، يصدر قرار تنفذه في الحين

ولينا عساكر روسهم تتواما  ،، درع البلاد وحصنها الحصين

القانون يبدو فارضين نظامه ،، والوطن نبدو فيه مرتاحين

وكان فيه مجرم ماقضاش احكامه ،، يزيدو على حكمه ثلاث السنين

والعفو منكم ياكبار الهامه ،، خوكم سرح في حلم غمضة عين

والقول راهو في الشهر ويامه ،، وكيف ناسنا باﻻكل مهتمين

زعمك جهل وﻻ طمع وغشامه ،، انشوفو الكنايس بيه مليانيين 

مانفكرو في فضل هلي صامه ،، ويبي أعماله فيه مقبولين 

مفرطين فيه منقصين قيامه،،اهو رحل وحنا الخسرانين 

يجيك يوم ماتنفع معاه ندامه،،تلقى المعاصي للسفر عوين

اللي قام ليله راقات اعزامه ،، يودع ويبكي دمعته في العين

ﻻهيين في سوق الدبش وسوامه،، رمضان مد اخطاه وأنتم وين

ﻻهي عليه بدنيته وأحلامه ،، وناسي ارجوعه للوطى  والطين 

ويالله بارك لتقي اقسامه ،، في رحمتك ورضاية الولدين

لومي على ناس

ننشد على ناس كانت معانا ،، وكنا حبايب وصحبه نقيه 

في بيت معلوم واضح مكانه ،،على البعد تشبح انواره قويه

ومربوعة العز فيها دفانا  ،،وكانون وناس والنار حيه

ونقاش عقال وافي اوزانه ،، ويحتد مرات يسخن شويه

وموحال في الرد تلقى عفانا ،، وما حد لي  خوه يضمر السيه 

متنوعه اقلامنا في لقانا  ،، وفيها من العلم وافر غنيه

واشعار مالقلب فيها رضانا ،، نمجد  ف هالوطن ناسه وفيه
اللي فضيقة الحال اهل الامانه ,, اللي اعروقهم طاقة في الميه
اللي جبال ماهزهم ريح جانا ,, ولا خربو الوطن بالمدفعية

ولصحابنا اندز كامل غلانا ،،وللوطن واﻷهل أجمل تحيه

واكثرهم اليوم هاجر اركانا  ،،ولاسباب مالفيس ماهي خفيه 

والفيس مانقول عنا خيانه ،، لكن مرض شين واحنا الضحيه 

بدى فيه فوﻻن يعرف فلانه ،، وميعاد مابينهم في العشيه 

بدى فيه هرطيل راكب احصانه ،، وفارس على سرز مافيش زيه

ماتعرفه منو عنده حصانا،، ﻻبد ورى لقب داره مطيه 

غدار وعمايله من ورانا ،، قليل خير باباه وأمه دعيه

حريصين عالفتن ماهم امعانا ،،مع ناس للفتن دارو خليه

وأعلامهم  سم مالي لسانه ،، يوزع فلدغات لنا هديه

وﻻهمهم وطن كثرة احزانا ،، وﻻجيل صارت أحواله رديه 

وﻻ وذن مسؤول تسمع ابكانا ،،وﻻ هامه اطياح سعد الرعية

لكن الكذاب عنده مكانه ،، ومقبول فجموعنا هالغبية  

وعفوا فهلفم خربت اوزانه ،، جمل ناسنا الباهية والرديه

من الهم والزيف كاثر خطانا ،، الزعلان نرضوه يأخذ خطيه 

في وين شيطان جامع اعوانا ،،وفي الفيس للناس كاتب وصيه 

ماتقبلو الصلح راهو اهانا ،، ولي مع الصلح ناقص حمية

وعاطي ضمانات وأول ضمانة ،، يموت قبل هالناس يفدي البقية

بالدم والروح يفدي اوطانا ،، صنديد من قبل صاحب قضية

ويجري ورى العافنه من ورانا ،،فتان لقاق خارب النية

تقول سحر معمول منا سقانا ،، انطيحو ورى العيب طيحة اميه

كانا شتم حد وﻻ نهانا ،، انطيعوه  نرموه بشتم زيه  

بلا بينه انتبعوا في هوانا ،، بلا علم ﻻ معرفة ﻻ ضوية 

وفوﻻدنا اليوم كاثر عزانا ،، اللي فارقو الهل من غير ديه 

ترى قول ياسامعي شن بلانا ،، من العار محصولنا والرزيه 

ﻻ ﻻمتا نجبدو في اغطانا ،، والنار دخانها   في الحوية 

تشن بينا انقتلو في ضنانا ،، اللي موتو موتة الجاهلية

نبو الخير والعز فرقة هنانا ،،بدى الوطن حماس واحنا القليه 

شح غيثنا وغار باعد ثرانا ،، وماتشوف في الوطن شجرات حيه

ويالله يارب تقبل دعانا ،، في الليل والفجر رافع ايديا 

يرجع اللي الظلم منا جافنا ،،اللي خاف ينشد باسم الهويه 

وتقودنا ناس في مستوانا،، عايشين في وطن ناسه نقيه

ويلتز نصاب مالبحر جانا ،، في حب هالوطن مانا سويه 

احنا حبنا يسيل داخل ادمانا ،،ونحموه باروح والبندقية

وحب غيرنا زور يبي رضانا ،، ويلعب فملعوب خطه ذكيه

لقى الوطن متروك دوبة اسنانا،، شرى ذمة اﻻخ  يقتل اوخيه 

وفيه بعض دلدول سابل اوذانا،،ﻻجى  من الميته ﻻ الحيه 

الحاصل على القول عاجز السانه ،، وخيك وفي الوجه جاتا ثانيه

وﻻ قافيه تفيد تنفع معانا ،، وﻻ حرف محبوك حبكه قويه

ناس غافله وفكر فاسد غزانا ،، اللي يرد مهناش حركه بطيه 

اراجو على منو زعمك عبانا ،، ومن وين هاﻻمل زعمك الجيه 

على طافيه انطيبو في غدانا ،، وياقعادنا بين طابت ونيه 

جاكم رمضان

الله وأكبر جاكم رمضان ،، يجرو بالخير سواقيه 

فلان اللي ودع شعبان ،، ويستنى تحل لياليه

وعارفهم فيهم غفران ،،فطين وماحد يوصيه 

على وجها باين فرحان ،، ويعرف هالشهر ومافيه 

مكتف محبوس الشيطان ،،حديث البخاري راويه 

ومقفوله أبواب النيران ،،مقسم والرحمه باديه 

وسطه للمؤمن غفران ،، تحزم لي ليله وحييه 

واخرهم فضل الحنان ،، المسلم مالنار ينجيه 

وماتنساش العشر أيام ،،توجه للخالق شاكيه 

وليلة تنجي اللي حيران ،،وفيها تنشال معاصيه

وفرصه للي كان وكان ،، يشمر مادام مواتيه

يسيب عادات الدوران ،،وللبيت يمد خطاويه 

يتوب ويرجع للايمان ،، عقاب الليل يمد يديه  

وفيه اللي طيب وانسان ،، حنيّن والغير يواسيه 

يقدر ويحب الجيران ،،ومايدير العيب وخاطيه 

كريم ومعروف بالحسان ،، اللي يشوفه تاعب يعطيه 

بشوش وماتشوفه زعلان ،، ويتبسم وين تلاقيه 

يرتل في أحزاب القران ،،وباحكام المصحف قاريه 

هضوم هما عباد الرحمن ،،الله يرحم والد ولديه

مشتاق نمش تدبديب

مشتاق نمشي تدبديب  ،،بين الحدب و الشعاب 

شوق الوطى للاشابيب  ،،تجي فايضه باﻷعشاب

اشاخيب تعقب اشاخيب ،،وفوق السحابه سحاب

يجي جور ماها تشقليب ،،يقل الحصى والتراب

في وين ماتعفس تغيب ،، رجلك اتجي للكعاب 

يموج السند والعراقيب ،،وتلبس خيار الثياب

منقوش فيها تخاضيب ،،تقول وهم وﻻ سراب

ويفوح من وردها الطيب،،مع الفجر عمم ضباب

وسبول داير شراريب ،، بدى فيه لون الطياب 

وحيون داير لواليب ،، مع الهود داير اسراب

وأقداح فيد الحلاليب ،، تجي فايضة للشراب 

تصب الشكاوي امازيب ،،في احفر وسط التراب

ومشتاق نشبح الذيب ،، وفي الجو طير العقاب

وخترش امداير دبيب ،، ولفاع تومي الرقاب 

وكانون داير لهاليب ،، عليه الحطب في الجناب 

وملهاد مليان  بسبيب ،، وميعاد أهل النقاب

وفرّوج ماهو على الكيب ،،على اسناح أم الصخاب 

ونخوض مخفي المساريب ،،في وين عش الغراب

ورقراق يبي تجاريب ،،وخفة اخطى والشباب

وبرور تبي أساليب ،، وكفوف ماهم ارطاب 
ولاطب لاهناك تطبيب ,, الا كوي ولا اعشاب
يبربر المجروح ويطيب ’’ وبالخيط قلع النياب

صبيعات كيف الكلاليب ،، يشدوه جمر الشهاب 

ويكالهم تمر وحليب ،، في ظل سمح الطناب 

ونخطو أصحاب التلوعيب ،،اللي الوطن منهم خراب

فالكذب حازوا ترأتيب ،، وداروا نظام الحزاب

مكاليب لمو مكاليب ،، يبو الذهب والقاب 

ﻻيعرفو حق ﻻ عيب ،،اﻻ نهش كيف الذياب

فقصور فيها مناسيب ،، عايشين لكن اذناب 

وراهم مشت في التلابيب ،،ناس خاطيين الصواب

رفعوه درجات ونقيب ،،وفي الفكر كيف الدواب 

من قبل ليهم مساريب  ،،وفي الجرم ليهم أصحاب

مجارم وكانو خنانيب  ،،محابيس خلف اﻻبواب 

التاريخ اهو قريب ،، شوفوه تلقوا الجواب

في الليل عقب المغاريب ،، يذاوحو  ز  الكلاب

واليوم عليو مراتيب ،، من الحرس دارو احجاب 

ومن قبل عشنا التحنديب ،،واليوم عشنا اﻻرهاب

سبحان ربي مكاتيب ،، يعلم أسباب العقاب

يالله ياعالم الغيب ،، خفف علينا الحساب

وجعل فرجها قريب ،، كربات رفعت احباب

وفرضاك وافر نصيب ،،وحسنات فوق الثواب

دعوة مظاليم ماتخيب .. على الله تلقى الجواب

زعمك يفيده كان قلت شهيد

قالوا عليه اقوال وزغاريد ،،وقالوا ولد يرحم اللي جاباته 

وقالوا شجاع وماﻻ صنديد ،،فزع لبلاده يوم ما ناداته 

خبر حق ثابت ثار بالتأكيد،،لكن عليم الله بي نياته

الناس تعرفه ماهوش جاي جديد،،مجرم خبيث ولص كانا واتا 

كان في الشوارع والطرق شريد،،ﻻحاس ﻻ بالوطن ﻻ ناساته 

واليوم يبي لبست العقيد ،، ويبي نياشينا وشكل عباته 

ويبي القيادة وأمر بالتنفيذ،، من برلمان ومؤتمر لخباطه 

ويبي صفوف محشده تحشيد،،ويبي عرب تهتف اليا شافاته 

عليك وقت متشقلب ودارك سيد،،ومدعوم ملي تشبهك حاﻻته

وبأين خراب الوطن كانا فيد ،،زﻻقيق كمشه يلعبوا بخيراته

علم دار فيه يقلدوا تقليد ،،ودايرين في هالشعب شي شماته

اليوم دايرينا ماعليه مزيد ،،يمشوا وراه يتبعوا في خطواته

اوين مات قالوا ياعليك فقيد،، صدمه كلاها الوطن يوم وفاته

استشهد وكتبوا في الحيوط شهيد،،مقبول عند الله في جناته 

زعمك يفيده كان قلت شهيد ،، ويمسح معاصي دارها في حياته

هيهات هلي دايره مايحيد ،،مكتوب بالاقلام في كتاباته

وﻻ في الحساب بينفعه تمجيد،،وﻻ صورته عالحيط سر نجاته

،،وﻻ دبدحة في اعلام ﻻ نشيد،وﻻ شهرته بتزيد في حسناته 

كأنه حياته عاشها عربيد ،،والخمر والتحشيش من صفاته

بالعنف والتقتيل والتهديد ،،سبب مشاكل واﻻطماع عماته 

ﻻفرض ﻻسنه وﻻ في العيد ،، يرجع يفكر في نهار صلاته

عاش الحياة في اللهو والتغريد ،،وبالظلم عبى لسفر مخلاته

وفارق الدنيا والعقاب شديد،،لكن الخالق واسعه رحماته 

حاظر ارد عليه

حاظر ارد عليه ،، ونقوله كلمات فيها الخير 

بالك غشيم وجاهله ماضيه،،وﻻ حديث السن جاي صغير

ونفهمه هالقول شن تاليه ،، اﻻ الفتن بين الناس والتدمير

وكأنه أستاذ الحقد حضر فيه،،شاطر المحصل فيه ماجستير

والكره في قلبه بدى عاميه ،، والناس تعرف معدنه شرير

والخير قاطع شجرته ناسيه ،، سنين طايله مرت عليه خبير

بسنة رسول الله بنحاكيه ،،وقبله كتاب الله والتفسير

ونخاطبه بالطيب والناجيه ،، ورب العباد يحث عالتذكير 

وبالنصح والتحذير والتوجيه ،، بالكش يصحى في اﻻعماق ضمير

وكأنه على رصفه حرث يبيه،، صابه وياكل من وراه شعير

مهبول يمكن ربنا يشفيه  ،، عليه القلم مرفوع خلي يدير

وكأنه يتبع والطمع عاميه  ،،وبالحقد يمشي وفي الخلاق فقير

ندعو الكريم برحمته يهديه ،، ونقوله راهو الزمان قصير

أكل خوت وأنت مبلي وسفيه،،تقول في كلام يودرك تودير

عليك الدعى من الزوز وتلاقيه ،،تجيك مأكنه وتكسرك تكسير

اللي بينهم بالفتن تبتنهيه ،،تحساب تلقى من وراك يسير

اترك عليك الحقد كون نبيه ،،ولي كسرته صعب في التجبير 

بالكش تلقى حل والداويه ،، الدير فعل طيب يقبلوه الغير 

وتزور هلى خوك ومجافيه  ،،وينطق باب الريح بمسامير 

ونلهو بأمن الوطن وجلاويه ،، والركبو عدسات للتصوير

ونرعو حدوده من اغراب تجيه ،،نديرو رقابة ونزبطو التزوير

ولي ملقي للكريم ايديه ،، ويبي صلاح الوطن والتعمير

ان شاء الله البركة في الكلام وفيه ،،وجمله عليه  نأمنو بالخير

عايش وشابح من زمان

هذه واحده من قصائد  شاعرنا سي عبد الحفيظ بن حديده عليه رحمة الله

يسطر فيها تجريته في الحياة ويعدد انواع من البشر  وصيفاتهم  والطيب منهم والخبيث

بما يحاكي واقعنا المرير  وما نراه اليوم  من تصرفات البعض  ويقول فيها : -

عايش وشابح من قديم زمان ** وعندي على حال الحياة تجريب

تفاصيل عارفها خفى وبيان ** على كل صيفه خير وتحنديب

خبر قايله ماهو طفير اللسان ** وجايب عليه القول بالترتيب

عاشرتهم ياسر الوان الوان ** وياسامعي خوذ الخبر تصويب

وحق من رسل الرسل والقرآن ** وعالم على حال العباد رقيب

في بعض صيفاته كما الشيطان ** يخلي رضيع الثدي راسه شيب

ريت العرب والترك والطليان ** ما ريت كيفه في العباد غريب

لادين عنده لا وفاء ويمان ** عاصيه ربي كذب وتقوليب

يسمسر بخوه وبوه في الميدان ** اليا كان يعرف مكسبه في الجيب

شاشيد ما بين الرفق فتان ** واقد لهيب الفتن بمشاهيب

اليا ماعرفته تقول غير انسان ** يقدم الطاعة واللسان رطيب

تحساب صاحب معرفه واحسان ** وهو مقاصد نيته تخريب

حاشاك يتركب كما السرطان ** ما عاد تلقاله دواء وطبيب

وسمّه على وجها ردان ردان ** تقول غير حربه مخضبه تخضيب

يقول في خبر مقلوب قال افلان ** وبعدين يظهر فتن واكاذيب

يخلي القلوب الصافيه عدوان ** اللي قبل في السابق تقول حليب

ونار حقد في قلبه بلا دخان ** لو كان يلقى يذوبك تذويب

ويضل يتموسح كما الثعبان ** كانك غفلت ينيبك تنييب

بخنجر خيانه يطعنك طعنان ** قلت حياء لاسحو لا ترييب

غدار متربي على الخونان ** اواخذ حسابه من النصيب  نصيب

وكانك عطيته في خاطرك الامان **  كيف من يرعي في المعيز الذيب

يصكك اليا واتاه في الصكان ** امدرب عليها حاجته تدريب

يجري ورى سوق البلى جريان ** وكان حصله يجدب امعاه جديب

واخذ طريق الشكر والذمان ** يحفر حفير السو وزراديب

وقت المصالح يعبدك عبدان ** تحساب ماعادش وراه حبيب

عليك تنفتح من جنته بيبان ** وبزور يحكيلك اميات سريب

يكافيه دير الخير بالنكران ** لين عالمليح يتوبك تتويب

وكانه عرف كذبه عليه يبان ** تشبح عيونه مروبه ترويب

يبرم اصداغه ويرتخو لوذان ** ما يستحي من شتم لا تهذيب

وهالشكل منا خاطري مليان ** وكبدي على سمر يدير لهيب

ولزفات ماليهم حرم لاشان ** ردي وصفهم في الاصل والتنسيب

اليا كان جيت فوسطهم تنهان ** ولا عندهم واحد اتقول اديب

يذوق الحديث ويفهم القولان ** وينهي على دير الخطا والعيب

هاضوك بيهم خاطرك يطمان ** ولاد لصل لايمكن نهار تخيب

ولا يوم قاصدهم مشى زعلان ** يلاقي قداهم قدر وتشرهيب

اولاد بن حسن

اولاد بن حسن اليوم يافرحتهم .. روح الحاج وباينه لمتهم

افراح كبيرة .. عاجز عليها خوك في تعبيره
يفكر بنادم قبل كيف مصيره .. اللي خاطفينه منين شن حجتهم
وتبدى تخمم والظنون كثيره .. مجارم علينا يفرضو كلمتهم
ودايرين منكر شين واعر ديره.. وفي كل جيه يعاودو فسيرتهم
لا مخليين شيوخ ناس كبيره..ولا مخليين اصغار في روضتهم
في الكوفنو ينباع بالتسعيرة .. بنادم بدى معروض في سلعتهم
ولي سمعني واجبي تحذيره .. وليام عكست شعبنا واتتهم
لكن ايام الظلم دوم قصيرة .. واليسر بعد العسر من صيفتهم
كلام ربنا وموضحاته السيره .. واهو الدليل اليوم في زحمتهم
ناس طيبه جتهم اليوم غفيره .. تبارك ارجوعه بالفرج هنتهم
الله لا تعاود ماجرى لغيره .. وقطع علينا ياقوي جرتهم

خلي وطنا

خلي وطنا موحش صعيب اعماره،،،من الدك خارب واضحات اضراره 

واضحات احزانه  ،،،،، وناسه جلت بسباب طيش ضنانا 

اليوم وطنا غيم رقى دخانه ،، وداخوا عربنا مالقوش ادباره 

اللي طاح بيته وانحرق دكانه ،، ولي رحل نازح وفات زواره

ولي صبر جازف وشد مكانه ،، تكالوا عليه وسودوه نهارا

بدى يخاف يلقى في الطريق خيانه،،تشده عصابه ويرفعوا السياره

ولي جيوبه بخيرها مليانا ،،كشفو رصيده وبايعين أسراره

قال المجارم كل يوم ورانا ،،ابتزاز  وﻻ خاطفين اصغاره 

ولي رقيق الحال مال زمانه ،، على قوت رزقه يلعبو السمساره 

مشى في القدام وكسرو مسلانه ،،قاعد حطيطه ماطلع من داره

على الشوك مشو ناسنا حفيانه ،، زاد حالهم فوق الهموم مراره 

اللي كان منا بالرصاص رمانا ،، والدعم يوصل فيه بالطياره

اخترناه لكن خانها اﻻمانه ،، مجنس وعنده في البلاد سفاره 

وين مايحس بخطر من يالانا ،، يمشط وتسمع مالبلاد فراره

وبعدين يطلق عالعباد السانه ،،جهال ماهم فاهمين حضاره 

كلامه اكله سب فيه اهانا ،، وهو االوحيد الناجمات افكاره

الحاصل بدينا دوم في الجبانه ،،ياندفنو يا جايين زياره 

بين البنادق والنحاس خذانا ،، والوطن جلسو في العروش اشراره 

جبابينا بوﻻدنا مليانه،، فقدنا غوالي من التريس خساره

غير باش تحموا وطنكم وركانه ،، وباش اتلقوا كان جتكم غاره 

اللي كان يفزع تم في الزنزانه ،،سجنتوه قلتو واضحات اخطاره 

اللي فزعته ترد العدو لاجانا،، اليوم في انفرادي غايبات اخباره

اللي خوك من دمك ولد فلانه ،،موجه قداه الكور والغداره 

ويالله يارحمن ياموﻻنا ،، رد كيد هلي بناسنا مكاره 

وطرطش خلايا في البلاد جبانا ،،مناديف وﻻ ماسكين وزاره

ويا الله سامع قولنا ودعانا ،،ترد شمل هلنا ايمينها ويساره 

ايصير العمار ويرفعو بنيانا  ،، والراي في يدين العزاز اكباره

الشياب هلي يقدرو لمانه ،، يلمو شتات الوطن تطفى ناره

ونبدو حبايب ضد من عادانا ،، وفي بلادنا مانقبلوش اماره 

ينبت العود وطالعات اغصانه ،،وفي بيت واحد ناكلوه ثماره

كونب نبت

كوني تبت تبت ،، وكوني العفو من ربي طلبت

وكوني خفت م السيه هربت ،، بعد احتد في الداخل صراع

ضميري رن في الداخل تعبت ،، حسابه صعب سببلي اوجاع 

ومنها النفس متكدر أغلبت ،، والشيطان يبرم في الشراع 

فعمق البحر توهني اذهبت ،، ضباب اﻵثم رافض اﻻنقشاع 

مد وجزر لخبطني حسبت ،، حسبه غلط عكس اﻻنتفاع

وزاد الوضع وضع الحال كبت،،ورفقة سو قلبت في الطباع 

مشيت أسير في الدنيا رغبت،،بين اللهو وفنون اﻻيقاع

غفلت صغر وعيوني عصبت،،والطاعات صارلها انقطاع

طعت النفس مهزوم انسحبت،،وصار الضعف في خط الدفاع

وخوفي انكون في اعمالي رسبت ،، والرحمن عنده اﻻطﻻع

ياموﻻي تغفر ماكتبت ،،فشبح ومشي عيني والكراع 

معاصي واجده منها شربت،،لكن تبت عنها باقتناع 

نجري جري بالرجعة اطربت ،،للطاعات عالطول الذراع

بروح وقلب فيهم ماكذبت ،،وللقران راغب اﻻستماع

وياموﻻي غفرانك طلبت،،للي يتوب يرجع باندفاع 

ويارحمن سجلني كسبت ،،في الفردوس والنعمة أنواع

ارويت مالبحر

رويت مالبحر ياخوي ماحسيت ،،طيب شرابه من هموم بلادي 

مرار ريقي بالبحر حليت ،، لقيته عسل برد عليا افادي 

كيف صبرنا في ليبيا ماريت ،، تاريخهم شاهد حضر وبوادي 

منهو اللي يقدر يقول انسيت ،، احزان صايره في الدوم ماﻻ وادي

شباب موتو في اتشاد بالسكيت ،، جتهم خيانه من صديق اتشادي 

جثامينهم قعدت بلا تحنيط ،، وقعدوا عشى للطير والفدفادي 

واليوم بين القتل والتمشيط ،، وبين المصارف والغلى في بلادي

نقص الدقيق وشيطو في الزيت،،ولي فضل ب لحقه البغدادي

ياوطن عشنا فيك جنب الحيط،، في الفقر والتكدير قلنا عادي

صابر على همك وفيك اربيت ،، قانيت لكن ماتبيش اتقادي 

ياوطن مانحساب فيك جنيت،،وﻻعيب درته بان فيه فسادي 

انبغطس وساكت في العوج دسيت ،،نبيك طيب يورثوك احفادي 

شاقي فقير فعيشتك عانيت،،ﻻهي الرقع في شروك بيادي 

واللي كتبته ذم فيك محيت ،،مصمم على حبك وزاد اعنادي 

مايوم جاني يأس وتخليت ،،على شبر منك ياتراب اجدادي 

بلاحيط ﻻسيسان درتك بيت،،وتوه انتلمس بعد كنت فرادي

على طابيه مهموم وتكيت ،،شارد انخمم بين جاي وغادي 

ماطولت تتكايتي وغفيت ،،خذتني احلامي في لذيذ رقادي 

ولنه حفالي جنبها مريت،،ولنا عربنا فارحه وتنادي 

بعد المرض ياوطنا صحيت،،وفي كل جيها دايرين نوادي

ياوطن شفت الخير وتهنيت ،،أوﻻدك فحضنك دايرين زرادي 

رقت المباني فيك وتعليت،،ولبراج فاتت في السحاب تقادي 

تنافس اللي سبقوك وتحديت ،،وبرج الخليفة قزم موش اندادي 

وفيك الشوارع ورد وقرانيت ،،عليهم ألوان الضي نوره هادي

لكن رزم بحذاي وانهزيت ،،صاروخ لونها الاحلام رمادي 

بعد خلعتي عاود العقل اوعيت ،،حالة اعديك حالتي ورقادي 

في وصت حفره غارقة ادربيت،،دايرينها مكب في اعتقادي

درت الكنايس كدس وتعليت ،، ودرت الحبال ملوحات عقادي 

وحاولت جهدي وفي اﻻخير نجيت ،،طالع ولكن مشيتي لبادي 

توجهت للعالي الكريم دعيت ،، يفرج غصايص هالعرب ويقادي 

ياوطن يامسكين

ياوطن يامغبون يامسكين ،،اللي يحس بحالك تسيل دموعه 

تشيط نار من وضعك وتحرق لين،،يفقد انفاسه مانظني يوعه 

اليوم خاطري مكسور تم حزين،، بشوفتك ركبت معايا لوعه

في كل جيها موت بالعشرين ،،ومفقود ناسه يحلموا برجوعه 

من غير هلي في الوكار سجين،،وهلي اطرافه نصها مقطوعه 

وهلي الشظايا ودرتله العين ،، وغيره يكت مكسرات اضلوعه 

وعيل ينادي بوي يما وين ،،واﻻم حارقها بكاه وجوعه 

ضنا عز فوق الشوك حفيانين ،،والغام تحت اقدامهم مزروعه 

اوين ناس كانوا بينا حيين ،، اوين الحبايب ماليه المربوعه 

وياهلي عشتوا فيه مغتربين ،،والغير عايش كلمته مسموعه

فوق الكراسي يمد في الرجلين،،يحكي يلاطي هامته مرفوعه 

وتمو الرواما بيه مهتمين ،،وكل حد داير في الخفى مشروعه

اصحو وديرو حل بأمر الدين ،،راهي وراكم مذيبه وضبوعه

للنهش والتقطيع ملتمين ،، الرحمه اللي في قلوبهم منزوعه 

ونبيك ياشعبي تكون فاطين ،، خبيث النوايا راك تمشي طوعه 

وأفطن منلي عندهم لونين ،، لقاقة المسؤول قبل اوقوعه 

وديرو حلول لخوت مختلفين ،،بأسباب فتنه بينهم موضوعه

راهو بلاكم ياعربنا شين ،، وراهو بلاكم طافيات اشموعه 

وبيكم يولي هالتراب حصين ،،وبيكم تنور قرمته وفروعه 

والوطن عنده لضناه حنين ،،مشتاق ترجع ناسنا مجموعة

ويالله نبو الناس ملتمين ،، وترجع محبه والنفوس قنوعه 

وصلو على المبعوث للثقلين ،،اللي صاحبوه قوالهم متبوعة

اللي علمهم في كتب دواوين،،برحمة العالي كلها مطبوعة

راقد في الدبش

مررت على هذه الابيات الشعرية الجميلة ومن خلال التعليق عليها يقول الاخ الكاسح الشكري انها له وحاولت المشاركه معه واليكم اولا ابيات السيد الكاسح : -

راقد في الدبش ..... احسبته مات حركته ربش ....ليه اسنين راقد في الدبش

يعيش معاي ديمه في الفراش ....وحالي دوم منه في رعاش 

.معاه وبيه عايش في غشش

مكسد دوم عندي دوم فاش ....وليه اسنين في داري يقش

احسبته مات ولا في انعاش ....قربته زاد في جسمي نتش

راقد وسط داري ....وساكن دوم يرتع في قراري 

عييت معاه جربت الحضاري ... ندهت شيوخ ما في حد خش 

جربت الطب وصفولي ايباري ....مانفعنش زادني غشش

قلت نهج ليه نترك ادياري ....لقيته معاي راحل في الدبش

منه راه ياخطاب ناري ....تلهلب لين تصهد فالغبش

وهذه محاولتي للمشاركة : -

راقد في الدبش ،، احسبته مات حركته ربش ،،ليه اسنين راقد في الدبش

راقد في الشلامه ،، وراقي معاي ملوي في العامه

مافارقش ﻻتمم دوامه ،، ﻻمن رفقي تاعب أدهش

نمشي فحال خلاني جهاما ،، فبالي صورته كيف الحنش 

ليل نهار يبرم في كمامه ،،وين انزوغ يبعثلي ب كش

حال عطيب مسودها غمامه ،،كان بصيص صرنا في العمش 

ﻻبالنار ﻻ نفعت احجامه ،، يطلع دم صافي في الشيش

دوري صار هامش في الدراما،،ﻻهشاش ﻻنقدر النش 

فوق البيت رقاهم اعلامه ،،ساكن فيه ف ركانه يوش

راقد في الدبش،، احسبته مات حركته ربش،،ليه اسنين راقد في الدبش

راقد في الجيوب ،، خلى خوك يمشي بالحبوب 

معي الضغط والسكر اقروب ،،وضعف النظر ﻻحقهم طرش 

بوسرحان ماعنده أسلوب ،،وين غلب في خناقي كمش 

يحبش خوك ﻻعند الغروب ،،اكله صم مالقيناش هش

زرع الغير يتماوج احبوب ،،وزرعي احذاه ميت مالعطش 

ﻻتضليل ﻻنسمة هبوب ،، حتى الضب في احفراه خش

اوقت الصقع مالقيناش ثوب،،يرعش خوك في القره اكفش 

حال الناس مافيهش اعيوب ،،وحالي دوم مرمي في الورش

راقد في الدبش ،، احسبته مات حركته ربش ،، ليه اسنين راقد في الدبش

يدقدق في الاوتاد * وحارث زرع يبيله احصاد * لكن خوك ناوي عالعناد * سلخا سلخ عالجلده نقش * ليل نهار والمنقاش حاد * جاني حي حيدني وخش * لا بالموس لا نافع ازناد * ذبحنا ذبح ينعنبو الطمش

راقد في الدبش ،، احسبته مات حركته ربش ،، ليه اسنين راقد في الدبش

مع الشكر لصاحب الابيات الي كانت سبب الموضوع

ياليبيا برواحنــــا نفدوك

ياليبيا برواحنــــا نفدوك .................انموتو على سباك ونصونوك

نحموا تراب الجـــــــــــــــد ...............جاهزين ديما للعدوا في الرد

صناديد بيهم تفخري في الغد.................يموتوا على سبّاك ويحبوك

ثاروا على عرش الظلام انهد..........فراسين باعوا الروح ما باعوك

وين ما ندهتي والظلام اشتدّ .............باعو الضنا واموالهم وشروك

وقفوا صفوف وللمعادي ضد............اللي سنين سوده طايله حكموك

من الترك والطليان جاك  نكد.............لكان يلقوا  في الغريق رموك

لكن عليهم عجلو بالرد ...................صناديد من وطنك اللي يفدوك

قدام  قوتهم الشعب صمد.......................بارواحهم وبدمهم يرووك

كلو كف من شعبك طبع في الخد .....رشم رشم في التاريخ ما ينسوك

شعبك بلادي ما نهار لبد.................ولا خان لا وقع عليك صكوك

عليهم العالم من بعيد شهد..................وصرّح اعلامه ليبيا انهنوك

ومش هدفنا يرضى علينا حدّ...............لكن مليحه في العيون نبوك

ويازهوة الخاطر وبيت الود................نهنيك بافراحك ولك مبروك

وتوه سواعدنا ويـــد فــــــــيد..................انشيد مباني فيك ونعلوك

ونختار من جيلك وجوه جدد.................وفيين لناسك وما يخونوك

وننسوا العداوه انبدلوها بود............ونمسح دروب مغرسه بالشوك

مشاريع تبدى مالهاش عدد...............وتعطي عراجينك اليا هزوك

وتبدي كما غيرك وليهم ند......................وحره ابيه ليبيا انسموك

الجيعان يلقى في ديارك ود..................يرقع بياده كان فيه شروك

وخيرات تبدى فايضه وتسد..........شملت اللي في غصرتك عادوك

ومسامحه هلى نكر وجحد................وبالعافنه في شرقتك جازوك

الكل عارفينك للضعيف سند.........سوى فحاجتك ولا سوى زاروك

تغير الحال وفاكات اعقد ................اللي سابقينك حلمهم يرضوك

شبابك فحضنك ما عليك بعد............ولا يطلعوا ناسك الغير يجوك

الله يجعلك للشارقين مدد.................الله يجعلك نجمه وما يطولوك

الله يحفظك مالغير كان حسد............الله يكسر اللي بكيدهم داسوك

ولي طلب الله ويده مد.....................دعاويه في وقت البلى نجوك

وصلي عللي للكريم سجد.............طواسيه في يوم العطش يرووك

اللي وصل فلكوثر عليه ورد.............جغمات منه عالعطش يغنوك