قصيدة المرحوم باذن الله سي عبد الحفيظ بن جديدة

الفار اضايقت من هم الزمان لجالي ،، بنطرح على اﻻخ الوزير حوالي

 ياضنوت البيتية ،،جيت قاصدك جلي الهموم عليا

 ضعيف حال مالي جهد ﻻماليه ،،وعايش على ربي الكريم تكالي

 مع الناس ﻻداير خطأ ﻻسيه ،،وشن بينا مال العباد ومالي

 لكن قلال الخير قصرت فيا ،،غريق بيرهم تقصر عليه حبالي

 قصير شبحهم وفكارهم دونيه ،،غرور ساسهم بيه النفوس عوالي

 زادوا مع هم الزمان عليا ،،فوق من هموما همهم متكالي

 في حوش خمس اسنين ساكن ليا،،وﻻ ظانه فيه الطلب هيالي

 فرحان نبي ورقة الملكية،،كلمة اطلوع اسهل قالوهالي

 يابطل رد الظالمين عليا ،،نرتاح مامنهم يجيني والي

 ويانصرت الشرق نهار العيا ،،الله ﻻيخيب من قداك امالي

 حصلت حوش احكومة ،،قديم من بقايا ايطاليا المهزومة

 ماهوش حوش بكلمة المفهومه،،وﻻهوش واسع ﻻيحض اشكالي

 رضيت بيه من وقتي كثير اهمومه ،،ونقص المهيه واﻻيجار الغالي

 فقير حال متقصي على المحتومة،،وﻻ بوي ساب املاك عقبهالي

 عرب بادية مانسكنوا في الحومه،،رفاقه مع جدي الغزال الفالي

 غير عكس من عكس الزمان وشومه،،اروحوا على شور التلاف جوالي

 خشيت منزل خلفاته روما ،،مطبخ وحجرة نوم بني ايطالي

 بلا حق دارولي عليه خصومه،،تصاريف ماهي خاطره عالبالي

 وغير حضرتك مالي حبيب اللومه ،،وﻻ أزمتي غيرك يفرجهالي

 حاول الزمان صعيبه ،، فيها حوالي واعرة وتعيبه

 تلجيت في مسكن عقاب اخريبه ،،قديمه من العهد القديم البالي

 الفيران فيها دايرات جليبة ،،فضاوي مثيل الفضوتي طهلالي

 اليا جيت بيا عندهم ترحيبا،،ويبدوا طرابا يرقصوا بذيالي

 وبوهم الشيباني بديت حبيبه ،،بضروف صارتله زمان حكالي

 من قطرته لزوه جى عالصيبه ،،انخاف ماطراله حتى أنا يطرالي

 تلجيت جيتك ياكبير الهيبة،،بالفضل تامرهم يخلوهالي

 الفار الكبير انحبه ،،صديق عمر ومعايا زمان تربى

 ﻻ دار سيه ﻻ خنب ﻻ خبى ،،ﻻنشتمه ﻻهو مطيرهالي

 ضراريه رباهم ربايا ذبه ،،فروخ شر ديما ياكلوا في اوكالي

 لصقع ذاخر بصطران وجبه،،كلوها وزادوا قرضوا سروالي

 ماعقبوش بصيرة،،هما مداعي وامهم شريره

 دعيت شر شيطانه عزوز كبيره،،سبله على سوق الرقيص اتشالي

 صلت عليها قط في التبكيره ،،مرسول يقبض روحها طوالي

 اليا ناشها القطوس كثر خيره ،،بش بعدها نوم الهناء يحلالي

 ولي صاحبي نخاطب عروس صغيرة،،يروح لقصره ومنزلي يفضالي

 ونديرله حفلة زفاف كبيرة،،ويدوم فرح الفار سبع ليالي

 وبعد انتهنوا نبعثوا لديره ،،ينظم قصيدة شعر يهديهالي

 ديره نبوه يهني ،،يتعب يجي لعرسنا متعني

 أنا عارفه شاعر كبير وفني ،،نبوه طق صفره موش ياليﻻلي

 ايجي كل من هوا حبيب يهني ،،سكان صحراء وساحلي وجبالي

 ونضل عاد فركبهم نستنى ،،اللي فكرهبا ولي على خيالي

 وﻻيخيب في جملة حبابي ظني ،،وحتى بعيد الدار يتعنالي

 بعثله ديره يهني قاله...

 حاضر نجوا لعرسه ،،كان اطلقتوا الزوز من هالترسة

 ويخطب صديقك بعد موت الهرسه ،،فاره صغيره ومشيها زﻻلي

 ويصير فرح الفار يعجب مرسه ،،وفيه العبده يلعبوا جلوالي

 واللمدوا جملت حلاه وخرصه ،،ومهر الوليه ندفعوه اجمالي

 اضايقت من هم الزمان لجالي ،،بنطرح على اﻻخ الوزير حوالي

الي يعقد في صباعي يعد

اللي يعقد

 اللي يعقد في صباعي يعد ،، يحلف فيا يبي الرد

 انقولله ياخوي حمد ،، عربنا كل حد فتياره

 ونا راني ماني مع حد،،وكل طير عشاه بمنقارة

 وتبي الحق اكل لمد ،،وغايتهم عملة ووزارة

 وقوﻻني راهو مايسد ،،وياموعر تفصيل اخبارة

 اليوم الخوت يوليو ضد،،روابطهم صارت منهارة

 وماحد ينشد عالحد ،،وكل حد يوصي فصغارة

 عدوك عمك راك تمد،،يديك وﻻتمشي فزيارة

 وحتى خالك راهو فسد ،، كرامة منقلبات فكارة

 وجدك عالثوار ارتد ،،يوشوش لحناك فدارة

 وحفتر قال الجيش وعد،،اللي عادينا جاه نهاره

 والنصرة لله سجد ،،يقاتل في وطنا بحرارة

 وجيش قصورة مستعد،،ومايهمه كان فيه اخسارة

 والقعقاع حلف بيرد،،يجهز في هجمه مكارة  

ونقصوا الليبيين عدد ،، ولو ينعدوا بالحارة

 وكل يوم الحالة تشتد،،طريق وشدينا في إسارة

 مظلم والمقصود أبعد ،،وﻻ مرسى لهناك منارة

 اوين تلاقي منه بد ،، الوطن اللي وﻻ خمارة

 معلي وافد شر وفد ،، بدينا حشاشين سكاره

 حبوب ترامادول جدد ،، وبعد اسبوع تولي افكارة

 وحظ الليبيين رقد ،،مريض تغذيته بشكارة

 ﻻيشبح ﻻقول يرد ،، ويتكلم كان باﻻشارة

 البير الجاف عليه ورد ،، وﻻ جاوي فاد وﻻ شبارة

 وأرثها من يوم اولد ،، مصائب دارت فيه امارة

 التركي عذب جد الجد،،وجده في عقيلة والقارة

 قاوم عالطليان لهد ،،معارك معروفه جبارة

 الطلياني ماليه عدد،،مجهز وجيوشة جرارة  

واستخدم حاجات جدد،،الدبابات مع الطيارة  

وداروا فينا يوم اسود،،فكل مكان علينا غارة  

وعاش الليبيين نكد،،الرأجل مايكسابش بارة

 من لفاجر ينوض يكد،،مكبش في العيشة بظفارة

 حافي والرجلين كرد،،دبيشاته كيف الحدارة

 جوع وعلة فوق رمد ،، وﻻمن يسعف ﻻسيارة

وجانا واحد قال طرد ،،الغازي وعلن انتصارة

 قال كلمة فيها أكد ،،تعيشوا فحريه وحضارة

 الله وعلم شن كان قصد،،وشن فيه مخبي في افكارة

 قال الليبيين سعد ،،تريح وطني من كفاره

 تراب الوطن اليوم ارتد،،وجايب هالعقيد ابشارة

 لكن فيسع جاهم رد ،،اللي عنده قاله في زوارة

 طلع في الواقع مستبد ،،وﻻيمكن ننسوا اللي داره

 ﻻراتب ﻻحوش يسد ،،وعشنا وقته بالقطارة

 وطموحه ماليهش حد ،،وغير لي هالشعب مساره

 نظريه وكتاب اسود ،، قصدي لخضر غير بصاره

 لقى من يهتفله ويرد ،وياقايد كمل مشواره

 وين تامر هالشعب يهد ،،ويفدوك صغاره وكباره

 الحاصل لقاقه وهبد ،،وهما اللي أسباب استمرارة

 طول في كرسيه قعد ،،ويحكم فينا بالصفارة

 لكن وين الشعب وقد ،،اولع في البارود شرارة

 ماعادش هالشعب برد ،،لين يأخذ منه بثارة

 وبعد اشهور طوال انشد ،،وضرباته من فوق نصاره

 متلوح والوعي فقد ،،وشداته الناس المحررة

عليه العالم كل شهد ،،اواتاها الناس فعزارة  

ملك وقايد وين لبد ،،منين جاته اكلها تجاره

 اهو الصقر اليوم حصد،،دعاوي هالناس المحتارة

 صدق ماقصر وين وعد،،ورافض من هالوطن فرارة

 وحكم الثورة فيه نفد،،وتمت قصت باب الحارة

 بعده موج الثورة مد،،تسونامي ياشين اعصارة

 عللي كانو ازﻻم حقد،،عليهم حصلوا بالسكارة

 وﻻرحمة ﻻمعاهم ود ،،ومرفوضة اقواله وعذارة

 الظالم والمظلوم جلد ،،وبانت عالمظلوم اضراره

 الوطني من الثوار نقد،،أوضح تاليته واخطاره

 خالفهم في الرأي بعد ،،من الوضع واخاف انفجاره

 عاجل من لعلام ورد،،وجى وقت الناس الثرثارة

 هذا يقول وهذا يرد ،،يمروح ويولع في نارة

 ولعت في وطني وصعد،،الدخان ومالي مطاره

 في الخزان ودار عمد،،اعلام العالم جاب اخبارة

 سوده امتدت فيهم يد،،وفرصتها الناس الحفارة

 ودبت فتنه ماتنسد ،، كبيره وختلفوا ثواره

 وحظ الليبيين رقد ،،عليه كتبوا زيارة ونيارة

قصة النسون

نسون هالوقت امورينا ..يحكي بعينا..منطاعين اليوم بدينا 

  

نسون قصقاص ………………حشيشتهم نعمه ولباس 

يتبع في موضة لنجاس………ولبس امقنط ما هو لينا 

ولا مبتر فيه نقاص……………وراقي لافوق ركابينا 

ولا النوع اللي بقاص……………..اللي منه لله شكينا 

وما يقبل حاجات ارخاص…الا اخر صيحه في المينا 

جيب حدايد جيب خراص……..وجيب بطاطين ادفينا 

ونوعلي شي كم خلاص……….ومن توكة يزه طزينه 

ونبو لزرزور اقفاص………وما عاد اتجيب السردينه 

نبو الحوت اللي غطاس………اللي ماكلته اتكون بنينا 

وما تنساش اتجيب اماس……وجيب من الخباز عجينه 

وجيبلنا رشيدة كسكاس………وكان فيه قصيعة بازينه 

وجيبلنا من المقهى انفاص….وباش اتخلص باقي دينه 

يطاوع ديما في الخناس…….وعالقرشين يحاسب فينا 

في المصرف عندك عساس….وتسحب كل اللي كفينا 

وتحطه كاتم لنفاس……………..وترعش ياربي نجينا 

وين تمشي معاك الحراس……في ابادي ولا في مدينا 

ولدك ولا ولد الناس…………….وراك يتبع فيك بعينه 

وكان فيه عزومه وعراس……..وشب الخاطرلتركينه 

تبدى واقف جنب الساس……….وتدعي ياربي تخلينا 

ومدنقر بحذاها الراس……….ومقهورين عليك غبينا 

زعمك ما فيهاش احساس…………تقدرنا وتحن علينا 

تطلقني نلبس لمداس…………..وحتى فرده بفرده بينا 

ونلقنه في القلب حماس………….ومن هم الطلبه ملينا 

يشدوني كان فمكناس……………..ونفتكا منك يابرينا 

وهم العيشه يكون انفاص……..وهكه في القرآن قرينا 

مايكون الراجل فناص………ولا تكون الزوجه روينا 

وخطوكم من قول الناس……….وخلوكم في قول نبينا 

رضى ربي هو الاساس……………..يوفقنا ويلم يدينا 

تهانينا للبلقاسات

انهني اليوم البلقاسات.............تحرر مالظلم اللي فات

جبد لوابس مدسوسات...........مليحه في الشنطه مبريه

يخربش بيهم في الورقات ..............وينقلها للنت نقيه

يحارب عالكل الجبهات............ومتشجع ميه في الميه

يوصف في كل الحالات..........اخبار وتفصيل علانيه

راح عصر الاستخبارات..........تلاشى شالوه الثوريه

لا سجن ولا سجانات.................ولا معمر لا نظريه

تمو الليبيات خوات ...................وتمو الليبيين خويه

وين قنفود الحجالات..........وين حمزه اللي في الليبيه

وين هاله في كل اوقات..........شرايطها ماهي منسيه

وين قادر بوه الزلفات..............تركهم بو تكه مرخيه

جابوهم في القانوات ...............اللي ترطن والعربيه

قالو رانا مغصوبات ...............الرحمة ياولاد البيتيه

ابكاهم يفجع لبنيات.....................وفسد نقشه زلاليه

وراحت كل التسريحات ........وطلعت باروكه مرميه

قعدو في الراس اشعيرات........وسوده بشرتها مطفيه

بانو في الواقع شينات .................الا بالشياته مطليه

وربي يغفر هالكلمات.............اللي طلعو بسيف عليا

ويحفظ ربي مالزلات...............اللسان بنادم شر بليه

وماعاد انعاود هيهات............الا كلمات اتكون سويه

ومش قصدي في ماضي فات...اللي طلعت معادش ليا

حتى كان يقولوا مات..........اتعاودها الناس اللي حيه

ونسأل من مولاي ثبات..............يبعدنا عن كل اذيه

نعيشو في خير وطاعات ......ونبدو مالناس المرضيه

ونبو منكم تكبيرات ..............وصلو عالخير البشريه

براد الشاهي

منسي  يابراد الشاهي ...............اللي يطيب فيك اليوم لاهي

ركرك  ياشاهي البراد................وفيض على الغاز وطفيه

اللي حطك راهو مرماد....................وتنظيم العاله خاطيه

وما يعرف شاهي الميعاد...................وقداش الوقت يكفيه

على انويره كيف المعتاد...................ايبكبك بطير مغاطيه

وكيف يبدى معقد يسواد.................ويعرف وقته ويصفيه

ويتخدم من غير فساد ......................مع اللقامه ويرغويه

وكان ناقص سكر ينزاد..............اللي يشرب طاسه اداويه

وكان طالت قعدت لجواد ..............ايزيد حشيشه يذكر فيه

وكان ولا الكانون رماد.................ايحط احطيبات ايحاييه

يديرله في النار امخاد ................وخوف من الواري يكفيه

خصوصي كانه فيه بياد..................مشلم من كل حواشيه

وتحت الحجنه يدير رشاد..............تخطي في النيران عليه

والطاسه فيها رفاد.........................تعلت فوق تحاذي فيه

مرقعها من غير عداد....................ومحبوكة بخيط مسديه

وفوق منه حلبه وجداد....................مرون عالطاسه طاليه

وكان صيف وقت احصاد...............وزرعه متخبل غاطيه

الطاسه والمزود والزاد...................عوين الحصاده تكفيه

منين يبدى في الراس اعناد...............الرغاطه فيسع تنهيه

وكان ايام الوقت اشداد.................اللي عنده الشاهي يخفيه

وكان طبخ شاهي البراد................يشمه اللي خاطم ويجيه

وحتى اللي فغفوه ورقاد.....................يشم الريحه وتوعيه

وحتى اللي ماشي يصطاد ............يدير الشاهي في مخاليه

وهذي عادتهم لجداد........................يسافر للشاهي يشريه

ويقطع بر يدير غراد.......................بروحة ما حد يحاذيه

خبير البراللي يسواد..........................يحوم بحصانه فاليه

اما جيل اليوم اعتاد .....................على مكياطه في قهاويه

كبير وعيل فيها انداد.....................مخاريم وغافل وسفيه

وعمت في شوارع لبلاد.................العادات اللي ماهي ليه

ادربينا ولينا بعاد........................وضاعت هالجيل مباديه

وفينا ومنا اللي رواد......................ومتغلين حقده عاميه

وين حصل فرصه وعتاد ..................خدم بتفكيره ويديه

يخرب ما يعرفش ارقاد.................وربي من فكره ناسيه

الله لاتحققله مراد.........................وربي من سمه يسقيه

وصلي عالسيد لسياد.....................اللي ربي راحمنا بيه

هلي قال هلنا ساكتين

هلي قال هلنا ساكتين ……...وما وقفوش في جملة عربنا 

وهلي قال هلنا غافلين……………والقطار عدى ما  ركبنا 

دير احساب راهم راكبين….مركب دين والمقصد عجبنا 

اصحى زين راهم عارفين…….كل ادروب مخفيه حسبنا 

ديما روس ماهم تابعين…..….لا قالوش في الماضي عقبنا 

خيل اسماح بيهم واتيين…..…….مالميدان ما يوم انسحبنا 

انشد هلك عن ماضي سنين…وقراء كتب وانشد عن نسبنا 

تلقى اسطور فيهم باينين………يكتب فيه رومي ما كتبنا 

وتلقى نسل هلنا صافيين..حليب الشرف مالزهراء شربنا 

شرع الله منا راويين……………….ما نخطوه والسنه ادبنا 

نحموا الجار مانا خايفين…………..كان فيوم بالندها طلبنا 

نستر عيب هلي غالطين……..…وكمي السر منه ما تعبنا 

ولا قالوش عنا ظالمين……..….وللي قال مسهلهم اصعبنا 

وقت العهد ديما وافيين…………….مانخونوش لامنا هربنا 

بيوت النجع ستره ظافيين………….ولي يمر قدامه عطبنا 

ما ينجاش يمشي في اليدين….وعرض الهل نحموه بجعبنا 

وطبع الهل ترجع حذفتين……اتجي مالخلف وتنادي عربنا 

تلقى وجوه بيضا هاديين…….تنادي الضيف يامربّح اقربنا 

بيوت الجود ديما واتيين…………للضيفان والعابر نصبنـــا 

بفضل الله ديما قادرين……..وكثر الضيف ما عمره رعبنا 

وانت اليوم جايب كلمتين………….ناوي الشر بتنزل ارتبنا 

قبلك ناس هلبه طامعين......وهاك اتشوف نحنا اللي كسبنا 

وكم من ناس تحفر في كمين………يفرح كان قالوله انصبنا 

يامعلاه مجد العاليين…………….وانت قزم ما فاتش اركبنا 

اهو جاك قول الواكدين…………..عابو التبو ما قالوش عبنا 

لكن وين ما رن الرزين………..بدت الناس تطري في لقبنا 

حتى التبو يرطن في رطين…..قصده يقول بوسيفي غلبنا 

واهل البر جمله عارفين…………زادو امجادنا ولا انهزبنا 

كل الناس بينا فارحين………وقت الصلح نكتم في غضبنا 

انقانو خبل ناسه حايرين………..طريق الحق عنا ما ذهبنا 

في الميعاد نبدو صابرين……...في الغلطان نقدوا ما غلبنا 

للفتان ديما صاحيين……………….كانه لف بالسنه ضربنا 

وبامر الله والنيه يلين…………….يقول امين بالاحكام طبنا 

وللرحمن ديما طايعين ……...……نطلب فيه وفرج كربنا