راقد في الدبش

مررت على هذه الابيات الشعرية الجميلة ومن خلال التعليق عليها يقول الاخ الكاسح الشكري انها له وحاولت المشاركه معه واليكم اولا ابيات السيد الكاسح : -

راقد في الدبش ..... احسبته مات حركته ربش ....ليه اسنين راقد في الدبش

يعيش معاي ديمه في الفراش ....وحالي دوم منه في رعاش 

.معاه وبيه عايش في غشش

مكسد دوم عندي دوم فاش ....وليه اسنين في داري يقش

احسبته مات ولا في انعاش ....قربته زاد في جسمي نتش

راقد وسط داري ....وساكن دوم يرتع في قراري 

عييت معاه جربت الحضاري ... ندهت شيوخ ما في حد خش 

جربت الطب وصفولي ايباري ....مانفعنش زادني غشش

قلت نهج ليه نترك ادياري ....لقيته معاي راحل في الدبش

منه راه ياخطاب ناري ....تلهلب لين تصهد فالغبش

وهذه محاولتي للمشاركة : -

راقد في الدبش ،، احسبته مات حركته ربش ،،ليه اسنين راقد في الدبش

راقد في الشلامه ،، وراقي معاي ملوي في العامه

مافارقش ﻻتمم دوامه ،، ﻻمن رفقي تاعب أدهش

نمشي فحال خلاني جهاما ،، فبالي صورته كيف الحنش 

ليل نهار يبرم في كمامه ،،وين انزوغ يبعثلي ب كش

حال عطيب مسودها غمامه ،،كان بصيص صرنا في العمش 

ﻻبالنار ﻻ نفعت احجامه ،، يطلع دم صافي في الشيش

دوري صار هامش في الدراما،،ﻻهشاش ﻻنقدر النش 

فوق البيت رقاهم اعلامه ،،ساكن فيه ف ركانه يوش

راقد في الدبش،، احسبته مات حركته ربش،،ليه اسنين راقد في الدبش

راقد في الجيوب ،، خلى خوك يمشي بالحبوب 

معي الضغط والسكر اقروب ،،وضعف النظر ﻻحقهم طرش 

بوسرحان ماعنده أسلوب ،،وين غلب في خناقي كمش 

يحبش خوك ﻻعند الغروب ،،اكله صم مالقيناش هش

زرع الغير يتماوج احبوب ،،وزرعي احذاه ميت مالعطش 

ﻻتضليل ﻻنسمة هبوب ،، حتى الضب في احفراه خش

اوقت الصقع مالقيناش ثوب،،يرعش خوك في القره اكفش 

حال الناس مافيهش اعيوب ،،وحالي دوم مرمي في الورش

راقد في الدبش ،، احسبته مات حركته ربش ،، ليه اسنين راقد في الدبش

يدقدق في الاوتاد * وحارث زرع يبيله احصاد * لكن خوك ناوي عالعناد * سلخا سلخ عالجلده نقش * ليل نهار والمنقاش حاد * جاني حي حيدني وخش * لا بالموس لا نافع ازناد * ذبحنا ذبح ينعنبو الطمش

راقد في الدبش ،، احسبته مات حركته ربش ،، ليه اسنين راقد في الدبش

مع الشكر لصاحب الابيات الي كانت سبب الموضوع

ياليبيا برواحنــــا نفدوك

ياليبيا برواحنــــا نفدوك .................انموتو على سباك ونصونوك

نحموا تراب الجـــــــــــــــد ...............جاهزين ديما للعدوا في الرد

صناديد بيهم تفخري في الغد.................يموتوا على سبّاك ويحبوك

ثاروا على عرش الظلام انهد..........فراسين باعوا الروح ما باعوك

وين ما ندهتي والظلام اشتدّ .............باعو الضنا واموالهم وشروك

وقفوا صفوف وللمعادي ضد............اللي سنين سوده طايله حكموك

من الترك والطليان جاك  نكد.............لكان يلقوا  في الغريق رموك

لكن عليهم عجلو بالرد ...................صناديد من وطنك اللي يفدوك

قدام  قوتهم الشعب صمد.......................بارواحهم وبدمهم يرووك

كلو كف من شعبك طبع في الخد .....رشم رشم في التاريخ ما ينسوك

شعبك بلادي ما نهار لبد.................ولا خان لا وقع عليك صكوك

عليهم العالم من بعيد شهد..................وصرّح اعلامه ليبيا انهنوك

ومش هدفنا يرضى علينا حدّ...............لكن مليحه في العيون نبوك

ويازهوة الخاطر وبيت الود................نهنيك بافراحك ولك مبروك

وتوه سواعدنا ويـــد فــــــــيد..................انشيد مباني فيك ونعلوك

ونختار من جيلك وجوه جدد.................وفيين لناسك وما يخونوك

وننسوا العداوه انبدلوها بود............ونمسح دروب مغرسه بالشوك

مشاريع تبدى مالهاش عدد...............وتعطي عراجينك اليا هزوك

وتبدي كما غيرك وليهم ند......................وحره ابيه ليبيا انسموك

الجيعان يلقى في ديارك ود..................يرقع بياده كان فيه شروك

وخيرات تبدى فايضه وتسد..........شملت اللي في غصرتك عادوك

ومسامحه هلى نكر وجحد................وبالعافنه في شرقتك جازوك

الكل عارفينك للضعيف سند.........سوى فحاجتك ولا سوى زاروك

تغير الحال وفاكات اعقد ................اللي سابقينك حلمهم يرضوك

شبابك فحضنك ما عليك بعد............ولا يطلعوا ناسك الغير يجوك

الله يجعلك للشارقين مدد.................الله يجعلك نجمه وما يطولوك

الله يحفظك مالغير كان حسد............الله يكسر اللي بكيدهم داسوك

ولي طلب الله ويده مد.....................دعاويه في وقت البلى نجوك

وصلي عللي للكريم سجد.............طواسيه في يوم العطش يرووك

اللي وصل فلكوثر عليه ورد.............جغمات منه عالعطش يغنوك

انت المطر

 أنت رابطني بيك مصير 

أنت في روحي أندسك دس  

وهذه المشاركة
  انت المطـــــــــــــر …. انت وادي بالخير يجر
 انت رفقه في كل سفر…….انت عقلي وبيك التفكير
 انت وجودك بحذاي يسر….انت لساني وبيك التعبير
 انت حصني من كل خطر…انت اميه من وسط البير 

انت في ليلي ضي قمر…..انت شمس وضي وتنوير
 انت شبحك للعين اقطر .…يداويها من مرض خطير
 انت دمي في عروق يمر.....انت رجليا بيك انسير 

انت عيل في الغمر اكبر..وما يرضى بفراش حرير
 انت ريموتي ومسيطر ….…..وقادر عالفتح التشفير 
انت قفلي وبك انسكر………..وما نقبل نفتح للغير
 انت طوق نجاتي مالشر….بساط الريح عليك انطير 
انت ظابط كان يصفر…يصف العسكر في طوابير
 انت حاكم كان يأشر ……………وزاره يبدلها ووزير 

انت في بلادي ليبي حر………..انت فبلاد الغير امير 

انت لوحة ياقوت احمر…….…..مصممها فنان خبير 

انت في قلبي اكبر سر…………مجهز لوصفك تقرير 

حروف وكلمات اتخبر ……..تكبر هلي كان صغير 

وفي الصحراء تنبت لخضر….ونهر مفور دار هدير 

وسواح اعاجم  وكفر…………….ونيتهم كان تدهوير 

انت تحلي في الريق المر….انت لعمى تخليه بصير 

انت مبنى في اعماق بحر…..وخاضع لافضل تطوير 

سماك القرش حذاه تمر…………وقرنيط ودلفين كبير 

انت عصفور حذاي يفر…………يرنم فألحانه ويطير 

يسمعني فالحان تسر…………اجمل من غنوه عالاثير 

انت صافي مافيك غتر………انت من قربك فاح عبير 

انت عالم ناجح ماهر……….مصنف في العالم وشهير 

انت سقراط اجيب كور………..انت زيكو فن وتمرير 

انت كبتن ما يوم اخسر………..وجمهوره كاثر ووفير 

انت فارس عالقوم ظهر….فوقت الغصره كيف الطير 

انت بستان وفيك صور…..…..اللي شافك بالعين يحير 

انت قانون اليوم صدر....….احكامه صعبات التحضير 

انت وادي في السيح يجر....…منقع في الساحات غدير 

انت بترول علينا يدر…....……….مصفّا ما يبي تكرير 

انت شاهد ما يوم نكر….......…..قواله لا يعرف تزوير 

انت فضه وياقوت ودر..........…..قدومه للخير تباشير 

الناس انواع خالقها قدير

الناس انواع خالقها قدير………….. قدر رزقها عالم السر 

بكل انفوسنا ربي خبير………………في القرآن وآياتها ذكر 

اعباده اصناف طيب والنكير ...... مختلفين ز اثمار الشجر

منهم خلق في شرعه  خبير …..…عاصي الله بعباده مكر 

ومنهم خلق في الباطل ايدير…….ومنهم خلق لامره صبر 

ومنهم خلق تأثيره كبير………….ومنهم خلق في الليه بعر 

ومنهم ناس حفيانه اتسير…….. ومامن ناس في العالي تفر 

وما من ناس تقطع في السرير…..طول الليل عل ضي القمر 

وما من ناس تركب في الحمير…عاشت دوم عالصب المطر 

وياما ناس ترحل عالبعير……..…..وياما ناس كسبتها بقر 

وما من ناس في خير وخمير……وما من ناس قاطعها الشر 

ومامن ناس متفرش حصير ……….عيشة هم ما عنده زهر 

وما من ناس تشرب في السكير.. مايصحاش لا يكمي فسر 

كان اتشوف مسكنهم اتحير…….تحت الموج في عمق البحر 

وما من ناس منهلهم غزير….وما من ناس تشرب في الغتر 

وما من ناس ملبسها حرير……وما من ناس في بيت الشعر 

وما من ناس مرقدها وثير………وما من ناس مسكنهم اقطر 

وما من بطل في الشده ذكير………وما من خلق بالذله شعر 

وما من ناس خبزتها شعير…..تحت الجمر ما تعرف اصفر 

وما من ناس تحلم بالكثير………..وما من ناس تقنع بالكسر 

وما من ناس صحتها بخير……….وما من ناس معلوله تكر 

وما من خلق في عمره صغير……بادي طول في الدنيا يزر 

وما من ناس مذهبها اللير…وما من ناس في المكسب اخسر 

وما من خلق بالحكمة بصير……..وما من خلق ما عنده نظر 

وما من نذل في بلاده امير…..وما من صقر عايش في كدر 

وما من عود رائحته عبير………وما من ورد عفينه ضهر 

وما من بشر منطقهم نكير………..وياما خلق رفقتهم تسر 

وياما حصن من ناسه هجير……وياما فج في الخالي اعمر 

وياما خلق في سجنه اسير………حكم الظلم في حقه صدر 

وما من خلق متوحش خطير………قاتل ناس يدهور وحر 

وما من ناس نفاخة الكير……….وما من ناس عيشتهم أمر 

وما من موج تسمعله هدير……يولي غثو وين يوصل البر 

وما من ريح تسمعله صفير……وبأمر الله ما يسبب ضرر 

وما من شخص في العالم شهير ….فكل مكان تلقاله صور 

يامندوب ياباشا  وزير......……..لكن خاب بفعله  اصغر 

ومامن شيخ متعلم كبير……………. خان الحق لدينه نكر 

فعله شين ما عنده ضمير……..جاب الفتن ومصائب الشر 

كل الناس يرحل لمصير…………بأمر الله مضمون السفر 

تطلع روحها  اتفارق اطير……والجثمان في الرمله اندثر 

يمن طامه وهم وسعير…………ونار جحيمها مالي الحفر 

ولا خير في وصفه تحير………..في جنات مليانه اخضر 

ويامولاي بعبادك بصير…………….كل اذنوبنا بيها انقر 

راهو العبد للرحمة فقير…………يطلب فيك خطيله الحر 

ارحم عبد قدامك كسير…………….لغير الله ما عنده مفر 

واخر قول صلو عالبشير……………..بيه الله للامه غفر 

قصر العمر ولا بيك طال

قصر العمر ولا بيك طال…..شقي فعيشتك ولا سعيــــــــــــــد

ملكت امواج وبحور الرمال….ولا جزر وانهار وعبيــــــــــــد

ولا بروج في علو الجبال……ولا فكيب مسقف جريـــــــــــــد

ولا فحصن مجلمد اقفال….والبيبان من اقوى الحديــــــــــــــد

ولا طرت خارج مالمجال…..ناوي تعيش في كوكب جديـــــــد

راهي النفس مودوعه اسوال ….بيها الله يفعل ما يريـــــــــــــد

ليها ملك في كل الاحوال ….امر الله عنا ما يحيـــــــــــــــــــــد

ملك الموت قبّاض الاجال…..ما يرحمش في النزعه شديـــــــد

مالتعذيب يطّعم اشكال….قبل الروح تطلع مالوريــــــــــــــــــد

وبعد الموت جى دور الاعمال ….زرع العمر واتي للحصيــــد

شن بذرت في عمر الدلال….وشن فرشت في القصر العتيـــــد

رحمك وين في الجلوه اقلال….ومن خاصمت في فرحت العيد

كنت صحيح تجمع في الاموال…وما فكرت في يوم الوعيــــــد

جمعت الرزق ماهمك حلال…..تكنز فيه تطلب في المزيـــــــد

هاك اليوم تحت من الرمال….لا ونّاس لا يوصل بريـــــــــــــد

لا في الجيب حطولك المال….وسط القبر تبتشري الجديــــــــد

لا رجلين في المشيه طوال…..لا ركبين تنفع في المريــــــــــد

وتما الدود ينهش في الاوصال…..ما ينشال لا ينحك بيـــــــــد

ما يخليش مالجثه احثال…..كان العظم مطنش فريــــــــــــــــد

وفي الايات موجوده امثال……..ركز زين ونظر للبعيـــــــــــد

كون حريص وبعد عالظلال….فوقت الضيق تلقالك رصيــــــد

يامخلوق جسمك هالكبير 1

يامخلوق جسمك هالكبير………دار الخير ولا دار شر 

راهو دوم للخالق فقير………..وليه حساب من رب البشر 

كبير اطراف جسمك وصغير…….تسمع صوتها بذنبك تقر 

لسانك كان في الفتنه خطير…….يفثرم دوم مايدسش فسر 

وليك قليب معبوده اللير……….وياما بصوت رنانه اسكر 

مغرم بيه ما يعرف يدير…………لا معروف لاربي شكر 

وليك عيون ما تعرف الخير……..تكشف كل ما ربي ستر 

تغمز دوم للباطل تشير………….من عملاتها وين المفر 

وليك افكارتحفر في حفير……….منها الجار والعابر انضر 

وليك ايدين نزّالة الطير……..…وليك رفق في العافن اكبر 

وليك اوذان عارفهم ايحير………من الممنوع جابولك خبر 

تنشر فيه وشكالك كثير…………تفضح ناس وتوزع صور 

وليك رجول في الظلمه تسير…..وما يهابوش في طول السفر 

شور الاثم تقطع في السرير……تجول اليابسه وعمق البحر 

طعت النفس وتركت الضمير….اصحى وفيق امرك في خطر 

راهو اليوم عن نفسك امير…....…..لكن ماشيه ايامك اتمر

مية عام عندك بالكثير ................ويفنى جيل ويقولوا اندثر

توب اليوم فكر في  المصير…….راهي ادروب مليانا وعر 

وكان غفلت عالجمر السعير……وعكس اطلوعها جتنا القمر 

دقيق الرحي ما يرجع شعير….ولي يتوب يحرث في البحر