زعم نفتكوا مالتشريد ،،وطني بوﻻده يهتم
زعم تفرح برجوع فقيد،،اﻻم اللي عانت مالهم
اللي دارت في الليل غريد،،حزينه وبكاها مأتم
زعم نلتموا ايد فليد ،،وميقولوش اليوم هجم
فﻻن محشد شوق حديد ،،ولي جيهة فﻻن انظم
وعشوائي في الصوت شديد،،على روس السكان خطم
وديما جاي عليه الكيد ،،المواطن مايوم اسلم
عزى كل يوم وموت جديد،،وكل شارع مليان خيم
،حتى الفرحة يوم العيد،،نكد ولت وأحزان وهم
وماننجوش من التهديد،،منلي يمشط فينا يضم
زعم يبقى المنكوب سعيد،،وينفتحوا خشومه ويشم
زعم يبقى يرفض ويريد،،المواطن لطرش ﻻصم
زعم يبقى ينقص ويزيد،،بروحة بالتأكيد حكم
وبيده السلطة والتنفيذ،،وماغيرة يقرب لبطم
مش كيف قوال العقيد،، وعدنا وفي وعده ماتم
ياشعبي أنت الوحيد ،،الحاكم والضباط خدم
الثروة ليكم بالتأكيد،،وثروتنا للغير قسم
زعم مابين الناس تحيد،،احقاد ومروية بالدم
زعم يصفي منه الوريد ،،ويتبدل بالود يعم
زعم يبدى طق مجاريد ،،وفرحة والميعاد رسم
وكل شاعر في بيات يزيد،،ويبداها بقول زعم
قوافي في قالب ترشيد،،تصحي اللي مليان غشم
زعم يبقى لعلام مفيد،،ونفتكوا من نشر السم
يقول الحق بلا تزويد،،ويفضح كأنه حد ظلم
صدق اللي قال المفيد ،، وقايل مجرودة وعلم
من ليبيا يأتي الجديد ،، ومعطنا كل يوم يجم
