ياكانون وين ناسك مشوا ..احكي وقول خيره الجمر مات
لافي الليل والع فيك ضو...........لاك ونس للي خاطمات
كانوا بيوت جنبك واختفو........كيف القصر ماهم مايلات
ليهم وقت جنبك ما لفوا...........اركان البر سود مظلمات
ولا هلك من جنبك جلوا..........اجنابك وقت ليهم باردات
لايحيوان يرتع لا فلوا...............والوديان منهم خاليات
اين لبط في جنبك رقوا............خبر قول علّي ماضيات
راهو القلب والخاطر بكو.......دموع العين منهم سايلات
يمكن مرض جاهم وانتهو........ونلقو عظام منهم باليات
ويمكن غزو منا ما نجوا..........كمل نجعهم شال البنات
خذاهم كبر خلاهم طغوا............والسيات فيهم كاثرات
ويمكن معصيه دارو خطوا.....وامر الله جاهم في سكات
نظف برهم منه فنوا.............جبال البر قعدوا راسيات
راك رفيقهم منك كلوا........مناصب سود عنك شاهدات
نارك دوم تسرز ما طفوا.....ولي ايخاف في ركنك يبات
قال ايام ياصاحب مضوا.........علّي يحس ماهم خافيات
ولي فجيلكم هلبه نسوا.......امجاد وفخر عندي مسجلات
وحتى اليوم كلماتك بطوا ...........لكن خير ملي ناسيات
وقلت الحق في جنبي رعوا........بل وسعي يبدوا فاليات
وشفت الخو يسند فيه خو .....بيوت النجع يبدوا شابكات
والرعيان في جنبي مشوا....يهشوا بصوت علّي شاردات
عايش وسطهم مني كلوا......وعندي اخبار منهم واكدات
بر الخير مالغازي حموا..........خيل اسماح يبدو واتيات
تصهل فوق كان قابل عدو........ما تنشد تقطع في الرباط
ينقز فوقها طائر الجو ........كيف الصقر عالفرسان فات
اصحاب الفرسنه ياما شقوا...........والوديان بيهم هانيات
من الوديان منهلهم ملوا...........جابو الخير منه واردات
بر الخير في وسطه زهو...........والوديان بيهم عامرات
من الخيرات قاصدهم عطوا.....يلقى راحته ويلقى المبات
شيوخ النجع بالطاعة صفوا....اركان البيت بيهم ضاويات
بنور الله والسنة ضوو..................عدالين للي مايلات
وانت اليوم في ضنك عصو ....ولا غرهم في المعصيات
حاشى جدهم منه نشوا..........ضنوة خير ما فيهم ازفات
صباغين ديما للوضو............حتى في الليالي الباردات
عقب الليل للخالق سعوا.....تبات الروس شوره ساجدات
كتاب الله في الروضه قروا......بالاحكام زين مرصعات
ما يشكوش لربي شكو..............يبوا العفو منه والثبات
ما يخافوش من غازي السو...لا يرضوش بسبي الخوات
وكم معروف داروه ورموا........يبوا ارضاه فلي جايات
قلب وروح بامره رضو............بذكر الله ديما عامرات
وتوه اولادهم يمكن شهو .......شور المدن هلي زاحمات
حياش اسماح في الشارع شرو.....ولا اشقق فلي عاليات
وشافو ناس ما تعرف هدو.....دوشه وسب بأعلا الاصوات
وشافو ناس في الشارع مشو ..صناف الخير ولي خاطيات
وشافو بينهم نسون رخو ......فوق الروس وافي الشاربات
وحق اللبس بالوافي عطو ......شروط الشرع يبدو كاملات
واشافوا غيرهم نسون شقو..........يمشو شبه ملي عاريات
قصار النظر عالمنظر عبو..........عالقطران يبدو واقفات
فات العمر وسنينه قضو.............في الاثام قعدو غارقات
وشافوا ناس مالخمره روو...طواسي الخمر موش مدرقات
وشافوا ناس م الجيره بكو.....اختارو الصبر عنهم والسكات
عقاب الليل في الخاطر دعو........يارحمن تهدي الغافلات
لكن ناسنا ثبتو بقو...................ومايديروش فلي عافنات
لاتعويج فيهم لا التوو..............كيف السود هلي راسيات
بالاخلاق والمبدى رقو.............فوق الفوق فلي سابحات
بالايات والسنه رسو.............سكنو الضيق ولا الواسعات
الغير الله ما هامه حنو...........شدّوا في الصحاح الواثقات
ويامولاي خطيهم السو...........وكون رحيم يوم الصافات
ليست هناك تعليقات:
إرسال تعليق