عندي وطن همه مايقل ،، راقي فوق واصل للسمــاء
وعندي وطن عيشنا فذل ،، فقر وهـــم ياملا شقـــاء
حكمه فرد عالناسه حمل ،، حقد الكــل منا مانجـــــا
كابس كبس رأبطها بتل ،، جبر الناس تأكل في الربا
ﻻ تعليم ﻻ مسكن يحل ،،مشاكل جيل مش ﻻقي غطاء
حكم الفرد في وطني فشل،،ولعت نار خلاته هبـــــاء
ثورة جيل للشارع نزل ،، يبي الموت رافضها الحيــــاة
نصره الله والطاغي قتل ،،حر اليوم شعبي في هنـــاء
لكن صار في الثورة خلل ،،وزاد الفتن بأسباب الدمــــاء
وطلعت ناس تزرع في العلل،، تكيد فكيد لينا في الخفاء
تغرس فيه تغريس الشتل ،،مسقي بحقــــد مامنا دواء
وفينا ناس مخترقه الكتل ،،ويبوا يفرقوا بين الأعضــاء
بالتمحيش وبكثر السبل،،معمي القلب مافيهش رجــاء
بالسكين ينحر في الجمل،،يبي الحمل يقعد في الوطاء
في التخريب زنده مايكل ،،لي هالوطن ماعنــده وﻻء
عنده أنصار منطقهم عسل ،،وقت الفعل يعطوا بالقفا
يمشوا لصف بالباطل قبل ،،يديروا فدير مبني عالخطاء
يحشوا فحش ضربتهم تعل ،،مايرحمش كان غيره بناء
نار الفتن في بلادي شعل ،،يبرم كيف برمان الرحــــاء
ومنهم ناس سايقهم جهل،،فـــي التصفـيق والـدوه لها
غروا بيه عالوطنه غفـل،،معاهــم وين مايبـوا مشــــى
في الميعاد بالدوه احصل ،،قلبوا بيـــه عالوطنه جنــــى
قسم وطن فركانه فصل،،شرق وغرب يبينا اجـــــــزاء
وفنيا ناس تسرق في المحل،،وميعيبـــاش ويقلك أنــــا
صحت وجه جلده زي الورل ،،انصابه وشر يحاسبه ذكاء
ناصب فخ ومداير حيل ،،ارزاق الناس فــي بطنا كــــلا
وفنيا بعض للباهــي يدل،،عمله خير ماهو للريـــــــاء
ماعمراش عالوطنه بخل ،،وقت الوطن ينده فيه جـــاء
في الغصرات أول من وصل،،مايطالبش منا في الكفــا
اعطاه الله في قلبه جعل،،خير ولين ولوطنه وفـــــــــاء
ويامـــوﻻي جنبنــا الزلل ،،ووحد وطنا وهدي الضنـــــــا
هراوة فاسنا منها نصل،،وراح الفأس في ليلة شتــــــاء
وسط الطين غطاه الوحل،،وموﻻ الفأس ماجابش نبــــأ
ولي الناس تحسابه فحل،،مواطي الراس عالغيره عبــا
في شبرين من الميه احصل،،غارق فيه ماطوره طفــــا
وقت الجري يمشي عالمهل،،تكنه الوطن من باله نســا
لكن فيه مكتوب السجل ،، في الجبهات وﻻ في الدفــــا
وياموﻻي ثبت هانخــــل ،،يعطي ثمار ويعم الرخـــــــــاء
وخلي الوطن راسي ز الجبل،،ورد الفأس يرجع للعصـــا
ان شاء الله تعجبكم
وربي يحفظ البلاد والعباد
ليست هناك تعليقات:
إرسال تعليق