ما يوصفكـــــــــــــش كـــــــــــلام…ولا ينكتب فضلك بخط اقلام
ولا شعـــر لامنثور لا انغــام…ولا لقيت في الخاطر اهناك وسيلة
الا قول ربي فــــي كتب لســـلام…موضح حقوق الام في تفصيله
تعامل الام بصبر واهتمـام …بطاعه وفيــه خاليــه مالحيلـــــــــة
كــــل المذاهب اكدت لحكــام…بتفصيل واضح كـــل شي بدليلـــه
وياما سمعنــا مــن خطاب إمام…صاحب افكار وعلم في تحصيله
يشدك اتحس معـــاه بانسجام…وعنده سلاسه فـي الخطاب جميلـه
ماهيش فــن وفتلكه واعــلام…لكــن المايل غايته تعديلــــــــــــــه
ينادي بواجب كــــــل للتزام…بطاعــة الام وعاقــها ياويلــــــــــه
وراهو ارضاها فتح من العلام…وحسنات مــن قدوس وافي كيله
ينور ادعاها يشيل كـــل ظلام…وينفع الشارق كـان تـاه دليلــــــه
راهي الجنه تحت مــن لقدام …وياسعـد هلـى الوالده تدعيلــــــــه
وكن فـي محبه وصل للارحام…راهي الروابط هالزمان قليلــــه
وقدم مع اوكالك اخضر واعظام… الزعلان خلي بسمتك تحكيلــه
وبيناتكـم تقديـر واحتـرام…ودع قريبـك كــان مد رحيلـــــــــــــه
وكانك اتواصل ما عليك ملام… دير واجبك والغير ما ترعيلـــه
كُنْ نبه ما تكونش من الظلام… وناجي وخيك بالرطيب احكيلــه
وكانه ظلـم فــي يوم مـن ليام… برر اغلاطـه بالمليـح افتيلــــــه
وكان ظُلمهم عبى الصدر أجمام… توجه لربك في الظلام اشكيله
بالكش بالنيه ايحيد غمام … وتربط اطراف امقطعه فــي العيلــه
وربي يحفظ الحيين ويتقبل المنتقلين اليه
ليست هناك تعليقات:
إرسال تعليق