خبر شين كدرني
خبر شين كدرني وغشش حالي …..يوم خبروني عالعزى لخوالي
يافولفو وين صاحبك وحبيبك …….وين من مجلي غمتك وطبيبك
كانك خربتي يرفعك ويجيبك …..وقال صوت ما طورك عليا غالي
لا يوم هنتي لا شكى من عيبك ....ولا قال منها صارلي وجرالي
السياره……
مانعرفاش يطول……………… فمطراح واحد ما عليه يحول
دوره ولنه عالسفر يعول ………..ويقطع فيافي سامحه وعلالي
عنده رفاقه يفرحو من لول…… وياما على عز الصحاب حكالي
في كل جيه في المدن يجول ………يخبر عليها في الكتب قرالي
واليوم تنصب في الخيم تعول ….ويش السبب راهو تكدر حالي
وفي صوت نبراتك خبر يتأول ….لخبط خواطر ياسره في بالي
الرد……
مافيه ما نحكيلك ……………….الا قولتي نعزيك فيه خليلك
ديري نحيب وعيطي في ليلك ……….ما عاد يلفالك مثيله والي
يبيعوك في الرابش قطع لجيلك.. وننساك ما عادش اتجي في بالي
يجيبو روافع عاليه وتشيلك ….ويمكن تكوني في ارشيف خيالي
السيارة……
مش واثقه في كلامك ……….ويمكن اتهلوس كاثرات احلامك
توى بلا مده دخل قدامك …….. ناوي قدى خوه الشقيق الغالي
ويمكن يلومه خوه وين ايامك …يا خوي راهو الكبر غير حالي
ويقوله مقبول كل ملامك ……..الا غيبتي بسباب كثر اشغالي
الرد……
اصحي من التخريف ……….وشوفي الحقيقة وزحمة التاليف
ومن حولك كان كلامي زيف …ومن حط فيك بضاعته من تالي
منين كان في المشيه قداك خفيف .. موحال ما يقدر يسوقك والي
السيارة……
مش لاقيه تفسير…………………ومش لاقيه كلمات للتعبير
علاش مايجيني يقولي بخير…….انا نعرفه في الضيق يتلجالي
يبدى يدندن في الطريق يسير……وياما قصائد باهيات روالي
تعلمت منه الفرح والتعبير…..ومشي الطرق في وين ما يحلالي
وسط الشوارع والزحام كبير…….ولا فسفرات الطريق الخالي
واخذ عليها في الرحيل خبير…..يوصل مكانه في العصير التالي
الرد…..
مش قادرين اقناعك ……………..تغني فقصايد فاتحه مذياعك
تبي انقولك راهو محمد باعك……..وزاد قالي راني قبضته مالي
والقصد راهو موش لو ذراعك ………..لكن حقيقه واكدات اقوالي
انوصيك حطي عالطريق كراعك …..ونسي شوارع كان فيها خالي
السياره…….
انا عارفاته راح ……………..وان شاء لله عند الكريم ارتاح
لكن انضمد في كثير اجراح ………وفرقة اللي زوله عليا غالي
والحزن راهو في الوفاء مباح ……والناس مشغوله وما تسغالي
ونا الريد منك يارفيق سماح ………..راني مسيكينه قليلة والي
بعتو عشيرتكم تبو لرباح ……….ماكان يخطر ديركم في بالي
الرد…..
ما كان يبي الربح …………………..الا شوفتك تقتل وتذبح ذبح
وين ما يشوفك في المساء والصبح …اتجي دمعته من شبحتك شتوالي
قرر ايبيعك مايبيلك شبح…………..وقال فرقتك فالجايات اهنالي
خبر شين كدرني وغشش حالي….
ليست هناك تعليقات:
إرسال تعليق