فيه اللي يحطـّـب للريح ....وفيه اللي الريح تحطبله
وفيه اللي ليله تسبيح ……….وفيه اللي ما يعرف قبله
وفيه اللي ففراش طريح………….ملوح ماحد يطيبله
وفيه اللي منكوب كسيح…….وكان شرّق حضه يغربله
وفيه اللي عاش تزلبيح ……..وين يبني حيطه تخربله
وفيه اللي في ركن صفيح ….وفقره في الركبين نصبله
وفيه اللي معافى وصحيح …وغيره في الفرش يرتبله
وفيه اللي في الناس مليح……..ويعطي والكل يسرّبْله
وفيه اللي وجوه مصابيح….وكان شفته نفسك تطربله
وفيه اللي مخروم مديح….خفيف ومخلوج على سبله
وفيه اللي في الباب ايطيح….وفيه اللي اللعالي يركبله
وفيه اللي في العقل رجيح……..وعائلته معروفه هبله
له منطق ولسان فصيح……….. يقولو نواره من زبله
وفيه اللي فوق من الريح……….منغنغ والحاكم يقربله
عالعالي دار مراجيح…………شرابه يجيه وما يتعبله
لكن ليه لسان قبيح…………….رزيل وما حد يترّبله
وفيه اللي م الدين ذبيح..….وخصمه في المده يحسبله
صغاره في الصقع ملاويح …….يلقي في يديه يرطبله
اللي يقصد يالاه ايميح………يغمض في عيونه يروبله
في فمه مرار الشيح………….ومتمني شويها تحلبله
وفيه اللي في الصرف شحيح….مداير صندوق ويهلبله
وفيه اللي في القلب جريح ...….مريض والشيخ يسببله
وفيه اللي نال مرابيح………….مواتيه العون ويلعبله
والناس اليوم مكاليح ………يعلم في الضنوه تخنبله
وياعالي نبو التصليح ……وطني من الخيرات اكتبله
ليست هناك تعليقات:
إرسال تعليق