اليوم قالو عيد الحب

اليوم قالو عيد الحب
قلنا خلي اردو على المحتفلين
يخبر فيا قال تهون
على سبت ضاوي الجبنون
انطقينا بباص اعيون
ونقشة حنه فعيد الحب الي مجننا
قتله باهي ربي يصون
اكتبله بالك فيه محنه
يقدر حال الي مجنون
ويبعثلك في الهاتف رنه
احتفلوا انت و المرهون
حنا صوب الغيات دفنا
وطن العز الي مرهون
انخمم في حاله شغلنا
راس اجدير الى المقرون
الى مساعد هاضوما هلنا
اليوم سكنتهم في قيطون
الي مهجر وضعه زعلنا
مشرد في بلاد الزيتون
خلاء ياوطني ياما منا
هم طلعلك كيف العون
الي ساكن فيك وساكنا
الي قالو راجل مضمون
تبين في السلطه يتمنى
يعاهد في وطنه و يخون
ولا مراعي فرض ولا سنه
كل واحد موسى مسنون
الي طامع كاثر مامنا
عملهم في غياب القانون
ابليس بدى متحشم منه
بامر الي خالق هالكون
الي خالق نيران وجنه
يجعلهم كيف البالون
تقوت لرياح وشالنه
الطيحه جاته فوق اسنون
اطرطش فوق تراب وطنا
الي خلو هلنا فقيطون
يغيبوا كيف غيبة بوشنه