ماجابها جري ملحاح

عندنا مثل شعبي يقول : -
ماجابها جري ملحاح .. جرى لين طاحو أقدامه
أمشيلها مشي مرتاح .. وقول يالله السلامة
زدنا شوي كلام مابين البيتين ان شاء الله يعجبكم

ماجابها جري ملحاح .. جرى لين طاحو أقدامه
ولا فرسنه وخيل وسلاح .. ولاهي بكبر الجهامة
ولا شيخ ينده فصلاح .. جاويه داير غمامه
ولا طير في الجو سبّاح .. بيجيب خاطي أقسامه
ولا زرع في اقدال فلاح .. شواويط في التّواما
تفنيه آفات ورياح .. ويجف مالغيث عاما
ولا سعي يرتع وسراح .. وميلادها بالتوامه
تكمل وراعيك يرتاح .. لا درّها لا أجلامة
ولا يجيبها شيخ سواح .. كل يوم تكتب أقلامه
والحكم والعرش ينزاح .. وتنذلّ فيه الزعامه
أمشيلها مشي مرتاح .. وقول يالله السلامة